輪到英國按揭有問題

早半年前，孫柏文介紹過一個網站叫ml-implode.com。呢個網站，就係數住06年尾開始，究竟有幾多個花旗國按揭中介公司執笠。我介紹嗰日，就有32間；不過，到半年之後嘅噚日為止，總共有152間。我今日再講呢個網站，係因為估緊佢哋會否向海外發展。去邊度？咪就係前宗主國囉！

前日，前宗主國有間叫Victoria Mortgages嘅按揭中介公司宣佈執笠。跟住就有好多前宗主國「地產界人士」走出嚟，大大聲話：「個別事件、個別事件。冇事、冇事。」去到呢度，孫柏文就要教大家一個法文字，呢個字就係deja vu。

囑滙豐賣英美業務

Deja vu呢個字點解？就係解「似曾相識、已經見過」。今年年初，花旗國按揭中介公司開始出事時，就連聯儲局伯南克都係話：「冇事、冇事。」到今日，相信我都毋須多講。

記得幾個禮拜前，孫柏文有機會同一個行政會議成員食飯。佢話前宗主國嘅地產業氣氛，同花旗國一模一樣，只係慢六個月。所以噚日見到Victoria宣佈執笠時，真係非常佩服嗰位行會成員對國際樓房市場瞭如指掌。

其實，如果前宗主國嘅地產業真係步花旗國後塵，我知道好多人都非常心愛嘅滙豐（005），就會面對更沉重嘅壓力。難怪有個外國「股壇長毛」Eric Knight，係咁叫滙豐管理層，賣晒喺前宗主國同花旗國嘅業務。即係要滙豐嘔番米特蘭銀行，同Household International出嚟。

唔嘔，就打到滙豐主席葛霖嘔或下台為止。

葛霖話睬Knight都儍

雖然，滙豐總裁喺七月尾嘅業績發佈會上，大大聲話過：「好多花旗國按揭中介公司執笠係好事！因為滙豐可以增加市場佔有率！」不過，上個月滙豐就宣佈會喺花旗國按揭業務上，開始裁員。所以唔好吓吓信晒滙豐管理層講嘅嘢。噚日，葛霖已經話，睬Knight都儍，不過真係冇人知道事態發展，之後會點。