Tuesday, January 08, 2008

最能代表08年嘅「詞」

如果孫柏文要大家投票選出,最能代表07年國際金融業嘅「詞」,相信大熱門一定係 subprime mortgage次按呢個詞。如果要我估最能代表08年嘅「詞」,相信將會係counterparty uncertainty。

Counterparty uncertainty係乜?直譯就係「對賭單位不明朗因素」。最好嘅比喻就係你走去賭馬,不過又唔係同馬會賭,搵咗個外圍落注。個外圍佬就係你嘅對賭單位。平時,同外圍佬落注,最重要就係你買嘅嗰隻馬第一隻過終點。揀唔揀到嗰隻冠軍馬,就係你嘅market risk「市場風險」。

買外圍嘅風險

例如,早排高盛冇好似其他花旗國金融機構咁,宣佈輸大錢,係因為賬面上佢哋入咗好多買次按債券下跌嘅衍生工具。不過,有時你雖然買中咗隻馬,不過外圍佬賠唔起,最後走佬,雖然賬面上贏咗,但最後得個桔。呢個就係買外圍嘅「對賭單位不明朗因素」。

咁點解我會估呢個詞將會叱咤08年國際金融業?又攞番高盛為例子,佢哋賬面上贏咗啲對賭單位好多錢,不過佢哋嘅對賭單位係邊個就冇人知。一旦對賭單位頂唔順,高盛就會得個桔,跟住要為手上嘅次按債券進行大幅撇賬。

對賭單位執笠

今時今日,好多銀行都有做對冲,賬面上輸極有個譜。不過如果對賭單位相繼執笠,國際金融業就會再掀巨浪。

大家可能會問:「如果咁危險,點解啲銀行高層唔出聲?」如果你係個做到月尾就會離職嘅私人助理,老闆下個月就要飛去見個大客,佢叫你買機票,話乜都唔理,最緊要平。你橫掂月尾就會走,所以幫襯間信譽唔好嘅旅行社,只要旅行社捱過月尾就會唔關你事,因為你已經做晒你要做嘅事。啲銀行高層就係呢個助理,明未?

No comments:

Post a Comment