擺酒派帖經濟學

呢幾日，孫柏文枕住講關於婚禮、婚宴，令好幾個fan屎估點解。理由可能因前個禮拜六，我做咗一次令我百感交集嘅戥穿石、婚宴節目主持人。又或者可能我年屆三十，仲係王老五，因荷爾蒙問題所以係咁諗呢啲議題。今日，應該係近期講呢個議題最後一篇文章，亦都可能係戲肉。噚日，分享過我舊老闆，幾十年前擺酒有得賺嘅經驗，所以今日想討論吓「如何擺酒有得賺」。

婚宴三方最緊要傾

因為自己未結過婚，所以未試過親身經歷擺酒經濟學。我只能夠分享，從周圍有擺酒經驗嘅人啲見解。

任何活動想做到有得賺，不外乎開源節流。開支主要係擺酒費用，收入就係賓客做嘅禮金。不過，因為婚宴金錢流向牽涉三大單位，男家父母、女家父母、新人，而各有所需，誘因不同。所以我其中一個消息來源，「勁靚女」Winery就強調，婚宴要成功，三大單位一定要傾。

朋友同事用作溝淡

如果唔講錢嘅走向，純粹希望開支少過收入，第一件事就要控制成本，問題嘅精髓，基本上係「喺酒樓定酒店擺？」因為擺酒開支係男家責任，所以想賺錢嘅新郎，要集中火力游說女家。佢哋ok？你就ok。

增加收入，亦係竅門。根據Rapiere話，一定要完全杜絕「闔府統請」，如果有結咗婚嘅朋友，除非同佢配偶好熟，否則唔請。不過因為親戚一定要闔府統請， Winery話，所以有仔女結咗婚嘅姨媽，就不單派帖畀姨媽，仲要派帖畀佢仔女，因為多一張帖，就多份禮。不過，最緊要係啲人畀現金做禮，黃金係好，不過親戚送金器，你阿媽一定唔畀你賣。

Rapiere最後補充，最好就係盡量請朋友、同事去「溝淡」親戚人數，維持一定比例。大家點睇？