「一注獨贏」07年總結

08年第一個交易日，係時候總結金手指篤過嘅「一注獨贏」貼士。07年嘅表現，附表清楚顯示。跟住我會講吓08年嘅展望。



白銀：一向被嘲為三線原材料，07年波幅居然細過恒生指數，全年埋單升15.6%。08年全球央行將會「好果斷」咁印銀紙，希望喺未爆發貨幣信心危機前，拯救銀行體制。我話好難。所以作為白銀戰隊隊長，維持原本建議：強力買入。

認沽證錯在冇放

和黃：06年11月建議買入，因為信佢推X-series會救到3。點知中期業績，X-series口碑好都係上唔到客。我亦即時取消建議。最搞笑係取消建議後，因資金自由行，和黃股價差啲到我提出嘅目標價。有冇可惜？冇。好似我以前股票行老闆話齋，作為分析員，right for the wrong reason都係冇用。

H指認沽證3497：06年尾推介沽H指，原因係H指當時升得太快。三月初，隻認沽證升過80%。點知成日覺得中央會繼續發功大力打擊股市，所以冇叫放，最後變廢紙。慘！

江西銅業（358）：由年初建議日至8月27日（到目標價）升咗48%，唔錯。不過之後居然可以再升100%見 32元。江銅要減少非開採業務，同埋放棄預售銅產，我先會再睇，大家自己執生。

等滙豐負面消息

滙豐（005）：07年2月， subprime一字仲係被《蘋果日報》繙譯成「次優質按揭」。優質？次？What？而SIV一字，第一次喺《蘋果日報》出現，就係6月9日財經版簡訊中。現在已經唔係「簡訊級」新聞囉。7月尾推介沽滙豐當日，亦提出112.5元目標價。當時肯定係我睇得最淡。今時今日，112.5元目標價？溫和啦。靜待滙豐減派息、（再）發盈警。
中油香港（135）：貼完冇幾日已升18%。不過之後掉頭走，有買現在已變大閘蟹。不過喺資源股中，呢隻防守力最強，大家唔使驚。只要公司油產量唔跌，07年業績會好過06年好多。屆時會爆發新升浪。