點守「最自由經濟」

噚日，又係一年一度花旗國傳統基金會Heritage Foundation封特區為全世界最自由經濟體系嘅日子。孫柏文作為本地自由市場智庫組織「獅子山學會」研究總監，係應該開心。

冧莊攞冠軍有因

不過某程度上，我哋可以維持冠軍地位，係因為排行第二嘅係新加坡。聽聞，花旗國人，不論組織、調查項目，都唔鍾意封新加坡為冧把溫，可能因為花旗國人寧接受真獨裁，都唔認同假民主。記得舊年，傳統基金會喺宣佈特區為最自由經濟體系嘅記者招待會上，曾經話過「銷售稅ok！」

大家可能會問：「佢哋都係自由智庫，點解會話可以接受銷售稅？」當時佢哋話，只要特區政府稅收總數維持一樣水平，即係銷售稅嘅收入，可以喺其他稅項減去，咁就冇問題。如果大家記得，政府當年推銷售稅，都話會減其他稅項。

排名冇變得分跌

我哋香港人當然比佢哋熟悉本地政府文化，所以聯合一起，反對銷售稅。有啲傳媒機構赤裸裸咁反；有啲表面上支持政府嘅傳媒機構，就標啲「入息稅最高稅率可減至12%」題，仲要將個「可」字，調校到特別細，等我哋香港人覺得呢啲傳媒機構有難言之隱。

今年，特區嘅排名雖然冇變，不過總得分就跌咗。冇辦法，反映主流意見嘅直選立法會議員，通通都係大政府主義者，係咁要政府「做啲嘢」。今年適逢立法會選舉，大家知點做啦！