「叻人」贏縮輸谷，你呢？

去年大奇迹日，孫柏文寫咗篇題目為「泡沫爆破後坐監大熱門」嘅文章。文裏面話花旗國每次有泡沫，爆破之後都會有啲人，好牽強咁被人拉去坐監。喺content is king嘅科網泡沫爆破後，就有教人煮餸嘅Martha Stewart被人拉去坐監。原先「內幕交易」嘅指控，連起訴證據都唔夠，最後求求其其屈佢「唔合作」算數。

拒與鐵達尼同沉

當時，我估喺花旗國樓市泡沫爆破後，最有機會鋃鐺入獄，就係花旗國最大按揭中介公司Countrywide Financial嘅主席Angelo Mozilo。就算咁多年嚟，Countrywide放嘅次按債冇問題，淨係公司直至舊年8月股價不斷下跌時，Mozilo都係咁賣手上以億元計嘅股份，而唔係好似鐵達尼船長一樣，跟住隻船一齊下沉。花旗國人覺得，你搞到間公司執笠is ok！最緊要係冇講大話，同埋冇攞着數。

寫嗰篇文之前幾日，大家都記得嗰種心慌慌。不過之後幾日，相繼有聯儲局做嘢，祖國宣佈「資金自由行」，特區政府入股港交所等好消息，好似噩夢發完一樣。嗰個禮拜，除咗以上消息，仲有美銀BOA宣佈以20億美元現金入股Countrywide，買16%股權。原來，美銀只要等多幾個月，就可以自己印價值40億美元嘅「公仔紙」股票，去「買」成間Countrywide番嚟。之前用20億都冇控制權，今日畀40億仲要攬上身。

以前細個，跟老竇入馬場，佢話最忌就係「贏縮輸谷」。美銀要同我老竇傾傾。