伯南克發第二重要言論

大家心目中嘅歷史巨人，往往都會嚟一次非常代表佢哋思維方向嘅言論。小平同志嘅「誰不改革」，就是呢種言論嘅好例子。

如果孫柏文問大家，聯儲局主席伯南克邊一次講話，最能代表佢嘅思維。

相信大家都會話：「一定係講『用直升機對抗通縮』嗰次。」呢個選擇，我都同意。不過上個禮拜五特區凌晨時分，從政策清晰角度嚟講，伯南克發表咗我相信係僅次於「直升機論」嘅言詞。

減息半厘機會跌

睇債券同利息期權價格走勢。原本由08年初開始，偉大嘅市場已開始預測一月聯儲局會議最有機會減半厘利息。不過上個禮拜，當市場聽到伯南克嘅言詞，減半厘嘅機會率急跌。雖然市場仲係覺得減半厘係聯儲局「最有可能」嘅選擇，不過信心嚴重動搖。

大家唔好誤會，市場唔係又覺得只會減0.25厘，而係聽完伯南克講嘢，市場覺得有45%機會減0.75厘（見右上圖）。要說服大家買白銀，孫柏文「一注獨贏買白銀」嘅言論，遠遠不及伯南克上個禮拜五嘅「substantive additional action」三個字。有時用少啲字真係仲有力。



岳少可請司機揸車

最後，聽聞林建岳用150萬打甩咗開車超速要釘牌單官司。我有個朋友話，佢用筆錢請司機，買架平治S500，毋須自己揸車都可以享受到快速感覺。

點都好，突然發覺近排多咗好多人黐呢款汽車貼紙（見圖）。大家知唔知點解？