債券保險公司——跌浪元兇

前晚聯儲局突然減息0.75厘，因為孫柏文嘅截稿時間呢排被大幅提早，所以噚日未有機會為大家分析。

聯儲局喺特區晚上時間突然減息，當然即刻令花旗國財經台CNBC，成為幾百個收費電視台當中，最好睇、最刺激嘅一個台。當晚原本已經可以放工，不過我都睇埋花旗國開市情況，先至離開公司。可能遲走咗，所以就咁啱同我哋《蘋果日報》財經版、跑銀行beat嘅記者，同一架巴士走。

啓動心臟起搏器

我就問嗰位前輩：「真刺激，諗住今日股市跌二千幾點，一定做頭條。點知聯儲局突然減息。呢排銀行beat真係好多嘢發生。」前輩：「今時今日，十分鐘時間可能已經係兩個世界。真係估唔到做財經版記者，仲刺激過做突發記者。我諗我已經係財經突發記者。」雖然只係電腦螢幕裏面嘅數字不斷跳動，居然比「死人冧樓」更充滿戲劇性。

前日講過，如果經濟體系就係身體，錢就係血液，而各大金融機構組成嘅信貸分配系統，就係心臟。講真，係因為心臟又停頓，聯儲局突然減息，啓動心臟起搏器。

只係降級仲未執笠

上個禮拜五花旗國最大債券保險公司Ambac，被Fitch信貸評級公司降級，即係被判死刑。

問題喺邊？各大基金、金融機構、銀行手上嘅債券，就算被瘋狂降級，只要買咗保險，會計上就可以用債券保險公司本身嘅信貸評級，作為嗰啲債券嘅評級。

呢啲債券保險公司，雖然股價已反映緊佢哋會執笠。不過，評級公司仲話佢哋係AAA。只要評級公司學Fitch降佢哋級，一夜之間就會有數以萬億計嘅債券同衍生產品，同時降級。呢個又係點解禮拜一啲歐洲銀行跌得咁甘。不過咁都未算大鑊，現在只係講降級，都已經咁大反應。真係執笠時，點算？