娛圈911公關界綺夢

2001年9月11日，花旗國紐約朝早9點55分，當時雙子塔只係冒煙，未冧之前，英國首相貝理雅有一位spin doctor「政治化妝師」叫Jo Moore，就喺嗰一刻發電郵畀各部門，電郵話：「It's now a very good day to get out anything we want to bury（今日係出壞消息嘅好日子）。」

呢句建議，冇錯非常涼薄，被揭發之後Jo Moore玩完，最後轉行做小學教師。

面對政治化妝、公關學上嘅問題，小弟唔多識，只係靠睇克林頓同萊溫斯基嘅醜聞，從中學習到皮毛，所以想向蘋果名采版台柱左丁山叔叔請教一下，喺公關學上，以下論調合唔合理。

靠自爆博同情

（一）壞消息一定要自己發放：今時今日互聯網世界，做過嘅嘢一定會被揭發。所以自己嘅壞消息，一定要自爆。理由係傳媒得到嘅所有第一手消息，都係喺你自己口中講出，結果殺傷力可以減低。

加上以自首形式自爆，唔係遮遮掩掩欲蓋彌彰，有懺悔意味，喺傳媒、讀者面前可攞啲同情分。

（二）突然有神風護航：喺自己啲壞消息傳出嘅同時，有另一段更震撼嘅消息，咁你嘅一切壞消息，即時由頭版新聞變成內版。

例如美國911當日，香港政府即使公佈2046都唔會有普選，相信第二日除咗《蘋果日報》，都唔會有報章做頭版報道。

趁壞消息避禍

講到呢度，小弟想問大家一個問題。呢次唔係娛樂圈911事件咩？首先，第一架飛機撞向大廈（第一張淫照被公開），大家理所當然半信半疑。不過都會開電視、電腦睇睇。

當大家嘅焦點都放喺大廈上，第二架飛機就撞正（第二張淫照出現）。

雖然明知可能仲有第三架飛機撞向五角大廈，不過一個Jo Moore級嘅土產公關，就會把握機會為老闆出壞消息。

而噚日開始爆發嘅娛圈911中，有邊個為自己出咗遲早會俾人知嘅壞消息？而因為呢個911避過咗做頭條新聞？最後，今日政府又有乜嘢壞消息出咗，不過由頭版變內版呢？