為乜結婚要擺酒

上個禮拜，孫柏文同大家分享過做婚宴節目主持人嘅經驗。我話過做主持人，最好就係當婚宴為一個國家級晚宴，新人父母為兩國元首，而主持人嘅我就係個佢哋唔熟識嘅低級外交官。即係當晚嘅節目應該老少咸宜，小心駛得萬年船咁平平淡淡。

從經濟學角度，揀婚宴主持好易出錯嘅原因，係因為新郎冇乜經驗。有如一個冇仇報嘅股市初哥一樣。

冇人識就係成功

有如當年一位曾經做過世界盃決賽球證咁分析：「如果歷史書冇特別提起邊個係當日嘅球證，而淨係記得兩球隊嘅人，個球證就算成功。」我覺得做主持人一樣。

好多fan屎都同我一樣，覺得今時今日啲婚宴節目已經走火入魔。諗啲節目出嚟，純粹為咗娛樂（後生仔女）賓客，唔係去鞏固婚禮、婚宴嘅功能。婚禮、婚宴嘅功能係乜？從人類學角度嚟講，就係對新人以高姿態，話畀佢哋接觸開嘅社區知，佢哋已經畀人mark咗，想擇偶唔該過主。

唔擺酒係咪唔得？我諗最少都要喺啲互聯網社區網站，例如facebook，話自己結咗婚，等所有你識嘅人都知。

結婚擺酒有錢賺

當然，「擺酒」呢個儀式，仲有其他功能。就係「被通知」嘅社區，走埋一齊送禮畀對新人。

仲記得，我以前股票行老闆話過，佢喺大學時，應承咗未來老婆，話一儲到錢擺酒就結婚。點知做咗成年股票行職員都未儲夠。後來女方施壓，舊老闆惟有諗辦法，最後決定向公司借糧，諗住有排還。點知，擺完酒，數一數禮金，發覺有賺。唔怪之得佢老人家可以做到股票行老闆。