民建聯做保皇黨真正理由

大家作為《金手指》嘅fan屎，可能察覺到孫柏文少鬧民建聯。我自己都有反覆咁諗過因由，得出兩個結論。第一就係「鬧民建聯」，已有好多人做緊，自問枝筆真係幾廢，冇可能同啲前輩鬥。所以都係鬧吓啲冇人鬧嘅嘢，例如鬧吓買咗好多次按嘅滙豐（005）算數。

少講少錯

第二就係民建聯將自己定位為「保皇黨」，而設計上作為「保皇黨」，就要好似鵪鶉咁，唔出聲默默支持政府。不過喺經濟議題上，少講少錯，就唔會畀我鬧。因為如果民建聯支持嘅政府政策出錯，啲人只會鬧政府。

再諗深一層。一向以來，孫柏文都仲估民建聯係出於自由意志，選擇做保皇黨。不過噚日，見到民建聯喺西隧搞抗議活動，我就對佢哋點解要做保皇黨嘅理由完全改觀。佢哋平時唔出聲係因為佢哋對政策，真係完全唔識。

該當何罪

首先，佢哋知唔知如果「成功爭取」壓低西隧回報率，將來唔會有人投資基建項目，要靠晒政府。靠晒政府問題喺邊？如果一旦計錯，就要納稅人補貼。

現在，西隧啲股東已經唔出聲鬧政府當年對需求嘅預測錯晒，好客氣。

仲有，西隧嘅股東之一就係中央國務院嘅中信集團旗下公司。中央政府搞中信出嚟為乜？
民建聯居然反對中央投資香港基建？
雖然冇講出口，試問仲有冇財團夠膽投資香港基建？
民建聯你該當何罪？