Saturday, January 26, 2008

資金自由行幾時落實

勁。噚日,正當大家又再次發「資金自由行」夢時,從歐洲傳嚟Societe Generale法興輸咗70億歐元。當中有49億歐元,係因為有一個,冇錯一個公司裏面嘅交易員,搵到法興風險管理制度嘅漏洞,又兼夾睇錯市,幫公司輸嘅。

大家可能會問:「法興係咪啱啱推出新嘅管理制度,所以揭發呢單嘢?」絕對唔係囉!原來係嗰個交易員自己自首,公司先至知。

所以我又想問,一個人究竟要輸公司幾多錢先至會自首?輸49億歐元就自首,點解唔等到50億呢?可能會反彈,輸少啲喎。

不過點都好,就算自首,都應該有排煩。上次新加坡 Baring's嘅利森Leeson,輸公司8億英鎊都已經要坐監,呢個法興交易員,我諗應洗乾淨pet pet準備入冊。

輸49億歐元只係炒魷

點知,睇法興關於呢單嘢嘅新聞稿,就真係勁搞笑。法興好嚴肅咁話:「呢個交易員已經被停職,我哋亦已展開解僱程序。」咩話?隱瞞公司輸49億歐元,即係特區政府每年入息稅收嘅兩倍,都只係炒、魷、魚?

法興真係勁,一定有神靈庇佑。因為如果唔係佛陀做主席,耶穌基督做總裁,點會可能咁寬宏大量?

點都好,噚日未有法興宣佈呢單嘢之前,恒指升過800點。原因係大陸又有人吹話會有「資金自由行」。以前孫柏文曾經講過,「資金自由行」要落實,一定要經過股災。因為唔想大陸股民變成特區股民嘅點心。

今日,再加多句。「資金自由行」不但要股災後,仲要等到特區股民聽到「資金自由行」都冇反應,同埋就算可以嚟,大陸股民都唔嚟,咁就會落實。大陸股民喺乜嘢情況之下可以嚟都唔嚟?大家自己諗諗。

No comments:

Post a Comment