Tuesday, January 22, 2008

股市咁就彈完

上個禮拜五,孫柏文為大家提供咗張恒指三年走勢圖。大家如果有睇到,都會見到恒指喺呢三年嚟,每次下試200日平均線時,都會見底同嚟一次大力反彈。

咁上個禮拜五,反彈力真係有,由最低到最高位反彈成千點。

最弊係,當日反彈力用晒喺修補嗰日成千點嘅低開裂口。禮拜五個市埋單只升80點。

政府做嘢非好事

如果大家不問世事,分分鐘會覺得噚日一定可以承接禮拜五個勢,繼續升。點知禮拜五晚,花旗國國會同總統布殊,宣佈「救市」方案嘅大方向,就係咁,為噚日全球股市埋下大跌伏線。

大家可能會問:「政府宣佈會『做啲嘢』救市,唔係件好事咩?」如果你覺得政府「做啲嘢」就自自然然係件好事,相信你絕對有資格去做特區立法會議員。不過股市呢啲現實世界,我就建議你千祈唔好行埋去。

作為《金手指》嘅fan屎,你哋明白今時今日最大危機,就係呢幾年嚟用開嘅信貸分配系統,完全停頓。因為一向用開控制風險嘅板斧,全部係錯嘅。如果經濟體系就係身體,錢就係血液,而各大金融機構衍生出嚟嘅信貸分配系統,就係心臟。

心臟有事醫對腳

即係話,呢一刻個病係心臟病。咁布殊同啲國會議員有乜反應?「為醫好呢個病,政府會非常果斷咁醫。醫嘅方法就係買好多藥油嚟捽腳!」冇料就唔使講,最大問題就係心臟問題呀大佬!關隻腳乜事?佢哋連邊度有事都唔知,仲唔嚇死人?

當然,上個禮拜五晚除咗有花旗政府敗露無能之外,仲有花旗國最大債券保險公司 Ambac被判處死,拖累股市。點判、點死、點累市?聽日再講。

3 comments:

  1. 3/4厘...朋友...你近來有運呀

    ReplyDelete
  2. 恒指跌到21,758點, 國指跌到11,912點, 按照經驗, 每逢股市從頂峰歷史高位回落40%便會見底. Intraday Low頂多亦只會掂到歷史高位下調之45-50%. 恒指同國指歷史高位分別爲31,638點同20,400點, 以此推算恒指同國指應該會在18,983點同12,240點見底. 恒指可能重會有D下跌空間, 但國指就系時間撈底, 反彈首選中電訊(728)因爲有流動電話牌照同A股上市概念, 次選招商銀行(3968), 中國一日在發展, 信貸就一定有需求, 加上長遠國營銀行一定鬥晤過commercial bank, 而招行概利息同非利息收入比例最balance, 似十足20年前概恒生, 所以有買貴晤買錯.

    另外, 美國個市就更加晤使擔心, 實有人出來救火, 從國際局勢看, 美國系無錢又好打概國家. 無錢又好打 - 即系爛仔. 如果無人出來救火就等於趕狗入窮巷, 分分鐘引起戰爭, 為免局勢失控, 無論中東或中國一定樂意使少少錢買個心安理得. 實際點看, 中東一直賣油比美國換取美元, 依家睇見手頭上的美金購買力越來越低, 差不多變成費紙, 心裏面一定好晤舒服, 趁美國的資產平平地, 一於做個順水人情, 美金換有形資產, 買平野兼救美國佬於水深火熱, 可謂一舉兩得.

    Check out my blog: http://hk.myblog.yahoo.com/

    ReplyDelete