Monday, January 21, 2008

信貸評級公司的末路 Lord have mercy on the rating agencies



Lord have mercy on the rating agencies


07年8月,孫柏文叫大家「一注獨沽賣滙豐」之後冇耐,我上有線電視財經台節目 Money Cafe,分享咗我覺得呢場國際信貸風暴要打完所需要嘅條件。

要預測場風暴打完條件,一定要同時提供埋風暴根源。我當時話過,呢場風嘅起因,就係啲投資銀行家,搵到信貸系統裏「屈機」方法。有玩過電子遊戲機嘅fan屎,都明「屈機」就係搵到遊戲程式中嘅漏洞,瘋狂用同一板斧重複又重複咁攞最大着數。

信貸系統屈機方法

喺信貸市場,投資銀行家發覺好多資金,不論來自基金或銀行,都非常依賴信貸評級公司提供嘅評級,作出買債券決定,只要話係AAA評級,基金經理或銀行職員,就可以向上頭交差,話自己買咗啲安全程度媲美通用電氣GE還款能力嘅債券。

「屈機」嘅方法,就係以財技製造AAA評級嘅債券,跟住提供比傳統、真正AAA 債券高少少嘅回報,就可以大賣。

評級公司仲要做埋啲投行家嘅顧問,收大量顧問費,教啲投行點樣包裝債券去攞AAA評級番嚟。最終結果,就連評級公司嘅制度都出現腐化,推出一個叫做「idealized default rate」嘅評級機制。

即係不同債券產品嘅同一評級,原來代表唔同程度嘅風險。一張A級市政府債券嘅走數機會率係1%,企業債券就1.8%,而經過證券化財技衍生出來嘅債券就2.7%。同一評級,唔同風險。

同一評級唔同風險

結果係點?攞今時今日,穆廸同標普仲評AAA嘅債券保險公司Ambac嚟講。Ambac發出用嚟借錢嘅債券,息率已達廿幾巴仙,即係高過信用卡利息,點解仲有AAA評級?即係市場已經唔理穆廸同標普嘅硬膠評級。評級冇人用,評級公司仲唔踏上末路?

1 comment:

  1. 究竟有乜野係值得相信? 乜野可以用嚟做投資參考? 唉...

    ReplyDelete