短線點炒？

今日，相信好多讀者晨咁早已經起身，睇特區各大報章嘅財經版，搵股市部署嘅頭緒。所以，孫柏文今日唔會浪費大家時間，即刻為各位fan屎提供一張圖表，以作參考。



大家可以見到，呢三年嚟恒指每次下試200日平均線時，不單止會反彈，仲要係入市嘅良機。多都唔講，淨係對上三次嘅下試，如果你入市，次次都會帶來豐厚回報。

牛市縱壞新丁

上次就係07年8月嘅大奇迹日，遇上資金自由行。之前就係07年2月滙豐首次發盈警，遇上大陸跌停板。再之前就係06年4月全球新興市場拆好倉。

大家都知，我每日下午四點半都會喺finance.appledaily.com，主持財經節目「你貼股、我教路」。節目嘅宗旨，就係畀讀者一個平台，為其他讀者提供投資建議。

好多時，聽完啲讀者嘅建議，同埋建議背後嘅分析，我都會忍唔住問個讀者炒咗幾耐股票。

我發覺，往往對自己建議最有信心嘅一群，就係嗰啲04年先開始炒股嘅讀者。同沈振盈沈大師傾過關於呢個現象，得出一個結論。呢幾年嘅大升浪，已經縱壞咗好多呢啲新晉炒家。甚至乎可以話，越勇越着數，唔勇就眼紅。

博反彈要小心

正當呢條200日平均線靈咗咁耐、靈咗咁多次。我相信股市應該會承接噚日升幅，畀面反彈。不過彈幾多？彈幾耐？真係唔知。

大家要緊記，喺未有資金自由行呢個概念前，恒指高位只係23600點。呢個高位仲要未爆發次按衍生出嚟嘅信貸危機。大家博反彈，真係要小心。