Tuesday, January 29, 2008

衷心多謝林建岳

孫柏文喺《金手指》呢個欄,有時都會講吓政治。有時仲會喺選舉期間,公開支持、反對某些候選人。甚至會公開誠邀一啲我覺得會稱職嘅人去參選。舊年9月7日,我就寫咗篇題為《我挺陳太!》嘅文,前政務司司長陳方安生亦不負所託,挺身而出,成功奪魁。

不過要承認,我一向評核候選人嘅機制,冇反映某些價值觀。例如,我一向只推薦嗰啲支持民主政制、自由市場、人權法治、保護私產嘅候選人。完全忽略嗰啲非常理性、只關心究竟啲政客會唔會幫佢哋「做啲嘢」嘅選民需要。

所以繼陳太之後,今日又再次公開誠邀另一位仁兄,我覺得絕對能夠滿足嗰啲只求政客「做啲嘢」嘅選民。佢,就係林建岳。

早排,林建岳飛車被差人用雷射槍捉到。佢打官司,成功將自己嘅車速,大幅降低。有人話因為佢請咗愛因斯坦打案,將速度改寫。其實佢只係用咗150萬,請咗頂級大狀,打到政府瞓低。

為公義身體力行

有人話唔公平,淨係有錢佬先可爭公義。只要大律師市場繼續壟斷,我不能否定呢個論調。不過,如果大家有車牌,問心一句,林建岳呢單嘢,搞到政府頭痕,唔大快人心咩?

試問有邊個,為公義,能夠身體力行,以身試法,走去試吓啲法例公唔公平?最後仲要揭露法例嘅醜陋?除咗林建岳,就得番長毛。如果好似當年長毛要求董建華下台,作為唯一嘅競選政綱一樣,林建岳可以喺四年內,將雷射槍打倒,仲唔值回票價?

給我們一個選擇

所以同上次誠邀陳太一樣,我只可以話:「A road system turns its lonely eyes to you。給我們一個選擇!懇求你,參選吧。」

最後,我想講吓上個禮拜五嘅人大「選舉」。我估唔到啲土共,可以咁忘恩負義,唔支持黃宜弘連任。今日就提供一張相片去提醒大家,黃宜弘當年盡忠職守嘅表現。

5 comments:

  1. 細細個已經聽人講:法律面前,窮人含撚.

    ReplyDelete
  2. "王面暈"呢次出局...其實理所當然..他當年的中指一伸...但開始為自己的政途倒數...大佬...你當日中指一拿拿晒全香港七佰萬人..就當你淨係拿上街的五十萬人..你都有排受...這個世界真係有因果的...dear "王面暈"..冇公職的日子..得閒看看"大隻佬",尋找你心中的孫果!!!

    ReplyDelete
  3. i am your real fans
    i like your opinions so much
    不如你參選, 你今時今日一定好多人支持
    唔會再比人沒收按金

    ReplyDelete
  4. 唔會再比人沒收按金?

    I am not so sure hahahahhaha

    ReplyDelete
  5. http://i83.photobucket.com/albums/j286/goldenphoto/l.jpg

    一句到尾.

    ReplyDelete