07年第一個交易日，係時候總結，孫柏文隻金手指為大家篤過貼士，喺06年嘅表現。其實長話短說，可以用以下14個字，「正股實貨笑呵呵、熊證賭波冇鼻哥」來做總結。以下個表可以清楚顯示成績。跟住我會講吓對啲貼士07年嘅展望。
白銀：全年大上大落，5月最高見過15美元一盎斯，不過幾個禮拜之後，就被打壓到9.48美元。我亦喺6月15日同9月18日兩次再叫大家買白銀。如無意外，花旗國樓市會繼續爆煲，令全球嘅中央銀行繼續瘋狂印銀紙，去挽救疲弱經濟，白銀豈能不升？仲要白銀基本供求嚴重錯配未解決，所以作為白銀戰隊隊長「白銀文」，維持原本建議：強力買入。
中石油：都係大上大落，原本去到5月8日，仲估可以叫大家鳴金收兵，準備出貨，點知道去到$9.6就開始回頭，可惜。最後要到11月尾，先至衝過$9.8。建議：冇，已經到價。
花旗國國家足球隊：叫大家買佢做世界盃小組E冠軍，點知USA、大包尾，道過歉，再道歉，完全高估咗花旗國足運發展。建議：下屆世界盃唔好再信花旗國足球！
恒指熊證6204：我建議大家買6204係因相信恒指已經喺06年見頂，而喺建議日之前，恒指最高17300 點，所以推介咗「莊家通殺價位」17500點嘅6204。點知，我高估咗一眾中央銀行打壓通脹嘅決心，6204被「判處斬殺」。呢個貼士嘅表現，真係好差勁！道過歉，再道歉！建議：除非美滙指數急跌下試80點，眾央行都會繼續印銀紙，股市大跌都好難。
和黃：睇圖大家仲以為我一建議買和黃，佢就大升。不過，比起啲國企股，和黃從建議當日計，都係得差唔多10%。短線而言，和黃賣和電嘅印度業務會繼續為股價 提供強大上升動力。長線而言，和黃將3G變成一個簡簡單單嘅無線寬頻上網服務，進行我覺得會成功嘅收費模式改革X-series。和黃將會包袱變黃金，維持原本建議：強力買入。
H指認沽證3497：推介原因係因我相信好多管理普通基金嘅經理，想跳船去對沖基金。所以為求省靚成績，就算明知短期唔扺買，都要 繼續谷高個市。維持原本建議：買啲當對沖，揸到1月尾。
以下06年成績表
No comments:
Post a Comment