「哈哈哈哈，哈哈哈哈哈哈，哈哈哈，哈哈哈哈哈哈哈哈哈哈，hehe呵呵哈哈哈！啊哈，哈，啊哈哈哈哈哈哈！」如果孫柏文今日問大家，以下三個作家，邊一個曾經喺自己專欄寫過以上句子？A.董橋B.畢明C.孫柏文。相信大家都會第一時間估係「C。低能仔孫柏文！」無他嘅，呢啲咁低能兼有濃郁呃稿費味道嘅句子，相信只有我先至寫得出。不過，以上句子其實係噚日B.畢明喺《蘋果日報》副刊名采版裏面寫出嚟嘅。
大 家不要驚奇，其實噚日畢明寫呢句話，係想為大家示範吓一種叫做「藍海策略」Blue Ocean Strategy。畢明解釋「藍海」即係一個未被開發，或者只有一個供應商嘅市場。如果一個市場有多個競爭者，就會出現互相仇殺嘅情況，當血溝水嘅時候， 就會將汪洋大海染成紅色，即係將「藍海」變成「紅海」Red Ocean。
畢明話，因為我哋特區已經有董橋先生同陶傑先生等文字功力非常高強嘅人，所以如果一個專欄作家，要採納「藍海策略」，就不如「放下身段去哈哈儍笑…因為他（陶傑）不是儍的，但我可以，哈哈。」
我今日要同大家分享畢明嘅見解，就係因為噚日孫柏文睇到畢明嘅文章時，發覺畢明已經篤爆咗《金手指》嘅市場定位策略。
不過，我想警告畢明千祈唔好想跳進「儍仔專欄」嘅市場，因為已經有孫柏文喺裏面。如果要將「儍仔專欄」嘅「藍海」變成「紅海」，最終勝利一定係我，因為以畢明嘅智慧，佢都只係可以扮儍仔，不過孫柏文就 係一個不折不扣嘅真儍仔。如果大家唔服，大家就要問一問自己，究竟當今世上最有可能寫出本篇文章第一句說話嘅人，又會係邊個？
死因不明
ReplyDelete