聽日，孫柏文就 會首次粉墨登場，喺灣仔會展舉辦嘅「《蘋果日報》07投資講座」，作出處女表演。講真嗰句，呢幾日真係感受到壓力，瞓都瞓得唔好。無他嘅，平時喺《金手 指》裏面篤爆謬論，都只會收到啲瘋癲回應信或電郵（看上），最多都只係聽吓啲瘋癲投訴。不過，聽日如果講錯嘢，將會有300個食鹽多過我食米嘅資深投資 者，可以兜口兜面咁「提醒我」。
好多人誤會，呢啲 投資講座，多數都係啲得閒冇嘢做嘅「羊太」先至會去。其他講座我唔知，不過，我哋《蘋果日報》搞嘅講座就一定唔係。理由係《蘋果日報》搞嘅講座，同其他單 位搞嘅講座唔同，我哋收入場費，所以觀眾席當中已經會少咗啲「得閒冇嘢做」先至嚟嘅人。希望聽日唔好「甩轆」。
賣完廣告入正題，講番今期全城最重要嘅新聞，百佳超級市場「油魚當鱈魚賣」案件。噚日，小弟篇批評百佳辯護方法好牽強嘅文章出街之後，四方八面嘅好友，都來電同我傾呢單嘢。
首 先，有《利字當頭》一欄總舵主利世民兄。佢喺電話度劈頭第一句：「屙油囉大佬！屙油啊！噚日先知我外母食好多呢啲油魚，佢話，仲估屙油係因為佢食嘅靈芝有 效！點知原來係呢啲油魚作怪。」我答：「聽講話呢啲油魚喺澳洲係用嚟炸油，啲油跟住會用嚟做機械潤滑油。」世民兄：「唔怪之得我外母呢排健步如飛，原來佢 雙腿之間唧咗潤滑油！」
我：「聽聞食呢啲油魚不單 止會屙油，分分仲會導致pre rectal bleeding。」世民兄：「我當年讀文科，唔該你解釋吓。」我：「Pre rectal bleeding廣東話即係解『屙拔甩』。」世民兄：「I see！不過，卒之明白點解8222長江生命科技搞唔起，食油魚已經可以屙油，根本唔需要買8222啲靈芝。原來長江生科係俾13和黃玩死。」
同 世民兄傾完之後，我嘅好朋友Rapiere就打電話來，佢話：「李嘉誠今次都好難搞。相信好多香港人仲記得佢喺2000年話過，和黃啲錢喺外國賺，香港仲 保留業務，係因為佢有愛心，唔係野心，因為佢深愛香港。大佬！唔係真係愛我哋愛成咁！」我：「其實，如果畀你做和黃嘅公關，今次會點搞？」
Rapiere： 「一定係採納陳馮富珍嘅解圍方法！即係話，應該叫李嘉誠出來開記者會，話日日食油魚，仲要話屋企人都食。不過，一定要澄清唔係淨係畀李澤楷食，費事被人誤 會，仲估佢喺度罰緊個仔。最好當然即刻開兩圍，李嘉誠親自餵佢個孫仔Michael Li食。咁百佳嘅問題就會迎刃而解。」Rapiere果然勁！
最 後，就係DNA出錯，汗水中含有pitera嘅靚女同事Winery，佢話：「食呢啲油魚屙油其實係好事，原理同去油丸Xenical同一道理。吸收唔 到，即係唔使肥，幾好！」我：「其實，我都想去試試呢啲油魚。咁多油嘅魚我話最好炭燒，肯定好香，仲要吸收唔到唔使肥，簡直係完美嘅食物。」 Winery：「你最好着住尿片嚟食，小心屙油！」食之前，我都想周一嶽交代，究竟食「油魚」有冇害？
No comments:
Post a Comment