本地油商要打靶嘅真正原因

呢排，孫柏文睇到好多關於本地油商「呃秤」嘅新聞。基本上，完全證據確鑿，好似我老竇話齋：「Guilty like hell！」。如果大家上個禮拜去咗火星，所以睇唔到有關報道，我就好快咁嚟一次「案件重演」。

冇上繳燃油稅

屯 仁街埃索（即全球最大上市公司、市值等如兩個滙豐嘅XOM埃克森美孚ExxonMobil嘅特區附屬品牌）油站，被驗出有一支「呃秤」油槍。出事之後，海關「放蛇」到同一個油站打油，居然發現每一次油站賣汽油，標示供油量比實際高出5%。事後，仲要被傳媒揭發，政府原來批准油槍有0.6%誤差。

大家可能會問：「點解孫柏文對呃秤呢啲自古至今都有嘅詐騙手法，咁激動？話要將本地油商處死，攞佢 哋去打靶？」大家唔好誤會，以我一個咁高層次嘅人，當然唔會因為呢啲咁低層次嘅詐騙手法，「強烈要求政府處死啲油商」。如果大家對特區零售汽油收費組成嘅 方法略懂一二，即係知道多過立法會議員李華明，不過，一年先至睇報紙一次嘅人，就會知道消費者每一次打油，畀嘅錢最大開支係畀燃油稅。

噚日，我見到有油站 賣無鉛汽油，每公升賣12.88元。而12.88元中，就有6.06元係燃油稅，即47%。

今日，我攞油商去打靶嘅原因，係因為油商賣100公升汽油，不過收105公升汽油錢嘅時候，等如油商同時間代政府從消費者袋中收取5公升汽油、冇上繳嘅燃油稅。我作為特區數一數二嘅愛國者，已經對逃稅非常反感，今次啲油商唔係逃稅，直情係「挾政府權力，中飽私囊」。如果唔拎佢哋去打靶，仲可以點？

挾政府權力中飽私囊

再 講，政府批准油槍有0.6%誤差，而有前油商坦白承認，好多油槍調校到啱啱少0.6%。呢個雖然係錯，不過絕對合法，所以大家冇得打靶。不過，大家知唔知 道如果全香港嘅油槍，都調校到啱啱少0.6%嘅電油，油商因為「挾政府權力，中飽私囊」代政府收、冇上繳嘅燃油稅，又有幾多？

根據政府數字，喺05年我哋 特區嘅汽車，唔計柴油等等，淨係無鉛汽油都燒咗大約4.5億公升。而如果油商「賣多」0.6%，就等如「賣多」2700萬公升電油。燃油稅就係6.06 元，亦即係油商「幫」政府收咗1.6億。係1.6億冇成本，令市民要求減燃油稅嘅利潤。

以前，埃克森美孚係由John D Rockefeller建立、叫Standard Oil嘅石油公司拆骨出嚟。可能因為Standard Oil個名太臭，所以，全部拆骨出嚟嘅公司都改名，e家剩番「標準石油氣」有用「Standard」呢個名。如果埃克森美孚再繼續「呃秤」，真係用乜名都死。