Wednesday, January 17, 2007

商品市場:風繼續吹!

前晚,孫柏文突然失眠,成晚用咗好多種方法都瞓唔着覺。經過好幾小時嘅掙扎,情緒亦開始唔穩定。忽然,靈機一觸,我走去電腦,開啓政府嘅網站,下載咗特區政府配合祖國 「十一五」計劃經濟……I mean經濟計劃嘅政策建議。


唔睇都冇事,一睇就大鑊。原本已經瞓唔着,一睇政府「十一五」嘅政策建議,直情令我興奮忘形。原來,我哋嘅特區政府想搞商品期貨市場,作為「白銀戰隊隊長」嘅我當然非常雀躍。

金融天才居然做公僕

文件中嘅建議,質素比我想像中強,原來一班「積極不干預」下訓練出來嘅政府官員,識點樣提供金融服務。有時,孫柏文覺得我哋特區真係好行運,因為有一班可以從事金融業嘅天才,放下身段做公僕。作為一個自由市場支持者,我很相信市場可以將資源好有效地分配,不過,金融業天 才居然會做公僕,都令我對香港作為全世界最自由市場嘅地方有懷疑。

其實,我哋特區係已經有非常龐大嘅商品期貨買賣,例如我以前做貿易行買賣嘅塑膠原料。一樣有人掛牌買貨賣貨,相信如果有需要統一報價,已經有人做咗。不過,再諗深一層,如果有人真係想為某一類商品搞統一報價,將各個貿易行嘅掛牌喺一個地方就 可以睇到,你哋估吓特區政府會有乜嘢反應?

如果做統一報價嘅人,諗埋一套完善嘅交收貨系統,你哋估吓特區政府會點?

最後,搞手為希望市價可以更快、更靈活到達能夠解決供求差別嘅價位,而引入同該類商品無關嘅投資者,你哋估吓政府會唔會拉人?

如果香港今時今日對商品市場或期貨買賣有需求,而冇供應,你哋估係因為政府「冇做嘢」?定係想搞商品市場嘅人怕咗政府?

請畀孫柏文一個機會

大 家要明白,政府官員第一樣要考慮嘅係會唔會「孭鑊」,冇人搞市場買賣就冇人要「孭鑊」,所以政府一定唔會畀人搞。大家可能會問:「不過,政府家唔係想搞 商品期貨市場咩?」係就係,因為政府有壓力要搞番個,不過,好似「五隧一橋」同「納指七雄」一樣,如果防止市場出現失敗,就要退到「就算有市場,都要冇成 交」嘅官僚第二防線。可以一路高叫「保護投資者」,一路打壓買賣。

如果就算大力打壓都仲有買賣,就等如有需求,到時候可以順水推舟,來多一次利益輸送,繼 續畀又名「港交所」嘅特區金融服務生產部,提供壟斷性行業一般有嘅服務水準。最後,我希望政府可以畀機會(等如唔好即刻拉人)孫柏文開一間白銀市場。睇番以前嘅新聞報道,我絕對有信心我哋特區可以提供實貨交收返祖國大陸。我哋已經有龐大嘅交收車隊,大家睇圖就明白!



孫記白銀市場車隊,就算要將白銀放車軸度運輸,都會成功將實貨大陸交收。

No comments:

Post a Comment