所以今日，我首先 想向所有讀者廣發英雄帖，希望大家都可以戴上一隻金手指。希望大家可以幫我，篤出香港所有售賣0.99、0.999、0.9999 Fine Silver白銀條嘅地方，我又好希望所有售賣實貨白銀條嘅商戶，可以寫電郵嚟insider@appledaily.com，等我可以為大家提供一啲建 議。希望大家可以踴躍來電郵！
入正題。噚晚，彭博通訊社同路透社都相繼報道，685明報企業會用股票吞併馬來西亞星洲媒體SCM.MK同南洋報業 NAN.MK。根據彭博，明報企業會用3.3股去換一股星洲媒體，同用3.47股換一股南洋報業。噚日，明報企業嘅收市價，係1.73元一股。以噚日嘅兌 換率嚟計，即係等如星洲媒體每股值2.56馬幣。
噚日，星洲媒體喺吉隆坡嘅收市價係3.2馬幣，如果彭博冇報道錯，真係3.3股明報企業換一股星洲媒體， 真係唔知呢單交易係唔係仲會有下文。不過，奇怪嘅係明報企業嘅股價，雖然喺06年一路橫行，喺每股1.3同1.5元之間徘徊，不過去到今年1月初，就喺兩 日之內，由1.35升至1.8元一股。如果明報企業每股仲係1.35元，3.3股就只會值2馬幣。
無獨有偶，如果睇番星洲媒體嘅股價走勢，又係同明報企業 一樣，今年1月初開始急升，由2.52升至3.2馬幣一股。翻查明報企業嘅紀錄，公司冇解釋過，股價點解會喺1月初急升，就連一張通告都冇。
唔 講吞併南洋報業嗰邊，淨係睇星洲媒體。根據彭博資料，星洲媒體已經發行嘅股票，數目達到3億股，而2馬幣同3.2馬幣嘅股價，令公司市值嘅分別係3.57 億港元。
大家要記得，係3.57億港元嘅分別。呢個分別，全因明報企業嘅股價喺兩日之內由1.35升至1.8元一股。大家可能會問：「兩日之內就可以將自 己股份，增加3.57億嘅購買力，唔通係神仙？」
其實，翻查買賣紀錄，喺呢半年來，明報企業嘅每日平均成交股數係75000股。不過喺股價急升嘅兩日，成 交股數達到每日大約40萬股，可能因為求過於供，所以股價就直線上升。雖然相比之下，嗰兩日嘅成交股數好似好多，不過，加埋都冇兩百萬港元。兩百萬港元嘅 成交，就造就咗3.57億元嘅購買力，孫柏文要向一向用「公信第一」做招牌嘅明報企業寫個「服」字！唔知港交所會唔會check check？
公信第一？-------------------------------------------------
後記：這一篇文章出街之後當日，股價繼續上升至最高價$2.58，收市$2.0。
No comments:
Post a Comment