你敢食大茶飯嗎？

噚日，日本中央銀行議息，亦已非常唔尋常嘅投票比數，6比3決定唔加息 （如果花旗國聯儲局議息投票比數有3個人反對，局長伯南克已經要下台）。各大傳媒、分析員紛紛出嚟解釋，話唔加息嘅理由係因為自民黨執政嘅日本政府，畀好 大壓力落獨立運作嘅中央銀行，而中央銀行承受唔到啲壓力，所以就範唔加息。

孫柏文相信， 最能代表呢一股有形壓力嘅係一句來自自民黨秘書長嘅說話。佢幾日前向日本央行行長贈咗句：「如果央行決定加息，央行嘅人一定要記得承受所有政治責任。」

如 果大家要分析點解「加息決定」被殺，最好嘅分析方法就係扮演一個偵探，好似查謀殺案一樣咁去分析。大家都知道殺人犯係一班自民黨嘅政客，不過動機係乜？殺 人武器又係乜？

大眾智慧：自民黨政客想殺死「加息」嘅動機，係因為怕日本再一次墮入通縮漩渦，到時候因為任何投資都需要龐大嘅回報先至值得做，所以會令企 業借錢去投資嘅意欲大減，再一次將經濟推向衰退局面。

自民黨政客殺死「加息」嘅武器，就係提醒央行嘅人，如果千禧時代嘅日本經濟因為噚日加息而引發通縮同 衰退，歷史會視佢哋為千古罪人。就因為以上動機同武器，日本央行亦排除會爆發80年代過度投資嘅戒心，宣布唔加息。

官僚最終只怕落台

我 問大家一句：「你信唔信以上嘅解釋？」如果你答：「信！」咁我就覺得你一定係「Always simple，sometimes naive。」

真正原因：自民黨政客想殺死「加息」嘅動機，係因為自民黨根本上係現今統治世界「紙幣狂魔黨」嘅中堅分子。「紙幣狂魔」最鍾意中央銀行濫發 鈔票，引發資產價格節節上升。任何嘢嘅價格上升，就係通脹，而喺通脹環境之下，受害者往往都係最冇權力、將錢放入銀行嘅一群人，而最大得益者就係嗰啲識玩 財技、喺建制嘅人。

日本央行呢幾年嚟嘅超低利息政策，已經令全球各國喺建制嘅人，因為可以借平錢去做投機買賣，搵好多錢。各國建制嘅人，都希望呢個局面可 以持續，自民黨作為建制「紙幣狂魔黨」成員之一，當然合作，殺死「加息決定」。問題係，乜嘢係殺人武器？日央行行長福井俊彥，同其他官僚一樣，最終只怕嘅 係「落台」。而官僚最容易下台嘅方法，就係爆出醜聞。

其實，喺06年6月，自民黨已經出過招。06年5月嘅時候，福井俊彥宣布超低利率時代過去，令全球資 產價格下跌，亦代表貨幣購買力增強。大家應該記得，到6月14日，所有資產價格全面反彈，升到今日。無獨有偶，舊年6月13日，亦係日本報章爆出福井俊彥 有未公布非法利潤嘅一日。而到上個禮拜，日本政府公布福井醜聞嘅初步調查結果，孫柏文相信就係呢個「溫馨提示」令佢哋決定唔加息。我想知道嘅係，究竟日本央行嘅人，仲有幾多痛腳被人揸住呢？而揸痛腳嘅人，仲可以食多幾耐呢啲大茶飯？