原材料係時候重拾升浪？

噚日，相信大家都將焦點放喺股市身上，呢點孫柏文絕對明白。因為，恒指同H指都相繼跌咗幾百點，特別H指始終得萬幾點，如果一日之內跌幾百點，真係心驚膽跳。不過，今日我想同大家講嘅唔係股票，而係都有一排冇講過嘅原材料。我記得當年我仲係一個石油分析員嘅時候，每一次見到啲客，我都會同佢哋講：「信我啦！石油一定升到大家都唔信。」不論當時石油係30蚊一桶，40蚊一桶，或者50蚊一桶又好，我都係始終如一，好consistently咁講。當年信我嘅客，好多時候都會問我：「石油升，點賭？」同「咁幾時先至好入市？」

何時入都係好時機

我嘅答案都係一樣：「大陸石油股。保守嘅可以買中石油（857），信中央政府政策會愈來愈開明嘅可以買386中石化，想搭基金經理順風車嘅可以買中海油（883），最後信我，覺得油價會升到大家都唔信嘅價位，就買中國（香港）石油（135）啦！」仲有：「任何時候入，都係好時機。」雖然啲客對點樣賭石油升嘅答案，冇乜異議。不過好多時候，啲客會對「任何時候入，都係好時機」呢個答案都持保留態度，有啲客甚至會窒我一句：「乜嘢時候入都得？即係話你冇做功課啦！」喺呢個時候，我就會同佢哋講：「如果你真係等得，你可以等到石油價格返回200平均線，如果啲油股緊貼油價咁升跌，就係最好時機入市。因為油價返回200日平均線，就會到底重拾升浪。不過因為唔可以擔保油股會緊貼油價咁升，所以都係買入先算。」

只係大升浪回氣期

最弊，今時今日嘅問題就係油價跌穿200平均線，仲要完全冇起色。情況仲要不限於油價，就連銅價都係一樣。上個月，我曾經講過如果銅價可以重返200平均線，江銅（358）就可以好快升一倍，不過今日睇形勢，買咗江銅嘅朋友就要等等。70年代中，已故花旗國總統福特在任嘅時候，好多原材料例如白銀、黃金、石油，都有出現回氣現象。好多人曾經講過，由01、02年開始嘅原材料大升浪，會長達10年，大家就要當06年尾07年初呢12個月為今次大升浪嘅回氣期。