30年代納粹德國，當時希特拉（Hitler）又係大喊要保護市民健康、製造「完美」社會，所以實施公眾場所全面禁煙嘅政策。歷史最後證明，禁煙只係第一步，煙民只係第一群受迫害嘅人。不過嗰篇文章出街嘅一日，我只收到支持禁煙嘅電郵，一個支持《金手指》嘅煙民都冇。到咗今日，我希望特區80萬個煙民卒之明白，乜嘢係被侵犯獨立自主權、乜嘢叫冇人尊重個人決定。
左偉國玩死醫生
早幾日，孫柏文喺電視機螢幕上，見到吸煙與健康委員會主席左偉國意氣風發嘅樣。左偉國個樣，有如當年希特拉成功吞併捷克之後，向波蘭宣戰一樣樣。繼公眾場所禁煙之後，再要求政府加煙草稅。殺完同性戀者、再追殺共產黨員、最後滅絕猶太人，為達到「完美」社會，會不遺餘力。唔通，呢啲就叫「強政勵治」？大家可能會問：「左偉國身為牙醫，點解要咁落力去宣傳反吸煙呢？」點解？有如我嘅朋友Rapiere話齋，左偉國一定係當年入唔到醫學院，迫住走去做牙醫，一路都懷恨在心。e家話禁煙，係知道好多醫生食煙，所以今次一鑊過，玩死佢哋。左偉國呢招夠晒毒，乜仇都報晒，佩服！
不如響應長毛遊行
今時今日，我知道有「長毛」之稱，視煙民哲．古華拉為偶像，自己今日都飽受被侵犯獨立自主權嘅立法會議員梁國雄，話會搞遊行抗議呢個政策。孫柏文今日發誓，如果梁議員搞遊行，我第一個到，仲會同佢肩並肩咁行。大家不如響應梁議員，遊行當日一路行，一路食煙，將維多利亞公園、軒尼詩道、政府合署變成全世界最煙火鼎盛嘅地方，喺一片二手煙之下，爭取獨立自主權！到時候，大家真係可以同自己講一句：「I walked a mile for a Camel！」
No comments:
Post a Comment