讀者問：H股跌完未？

未。

孫柏文喺06年最後一個交易日，即係12月29日嘅《金手指》，曾經叫過大家「一注獨贏」買H指認沽證。理由係因為我覺得06年最後6個月，H股指數走勢有如03年嘅最後6個月。

而一眾分析員、財經口水佬喺06年尾用來辯護H股點解應該升嘅理由同熱情，真係同03年比較有過之而無不及之勢。

重鎚宏觀調控所致

當 然，喺12月29日，我亦曾經話過啲H指認沽證，如果從04年初嘅經驗學習，大家應該喺07年1月尾放出去。雖然，H股指數喺04年要到4、5月先至見 底，不過大部份嘅跌幅都係因當年3月開始嘅「重鎚」宏觀調控所引致，所以不能單從03年尾升幅過急而預測得到。大家可能會問：「大陸政府又好似玩宏調，將 銀行主宰放債能力嘅存款準備金推高，H股指數會唔會來一次04年翻版？」

如果歷史重演……

我 覺得祖國政府喺達到宏觀調控目標嘅政策選擇已經成熟好多，應該唔會好似04年咁，突然宣布全國所有銀行不能放債，呢啲極度擾民、極度粗暴嘅宏調政策。不 過，我都有計算過如果H指今次下跌幅度，猶如04年一樣，會跌幾多。睇番歷史，03年尾嘅H指升浪，喺04年嘅1月初見頂，當時H指見5391點。去到5 月中，H指喺3546點見底，即係由1月至5月H指跌咗35%。今次升浪，H指喺今年第一個交易日，即1月3日見頂，報收10766點。如果今年歷史重 演，H指跌35%，H指就可以跌到7081點。大家可能會問：「如果咁樣急跌，係唔係等如呢個大升浪玩完？」

將國壽H股賣畀同胞

大 家作為我嘅fan屎，都知道我好鍾意用200日平均線去協作決定升浪係唔係玩完。而H指今日200日平均線就係喺7350點，所以就算H指跌到7081 點，都應該可以仲算係「調整」，而升浪未完。今次H指大升浪嘅龍頭股，就一定係中國人壽（2628）。中國人壽升咗幾多？市值已經係全球第二大保險公司。 唔通，真係每個中國人都會有一張保單？

點都好，今次中國人壽大升浪嘅高潮，一定係中國人壽A股上市日。今日孫柏文想 問一句，點解唔可以畀我賣手上中國人壽嘅H股畀啲同胞當A股？兩種股份，每股派息一樣，投票決定權又係一樣，點解要將我哋分隔？不如就簡簡單單，畀特區股 民只要手上有H股，就可以出一張預託證券China Depository Receipt賣畀我國同胞。等兩地嘅差價，唔會咁肉酸。