金手指貼士第二季總結

7月第一個交易日，係時候總結孫柏文隻金手指為大家篤嘅貼士第二季嘅表現。可以用以下12個字做總結，「H股好勁，put輪打靶，其他發呆」。以下個成績表（附表）可以清楚顯示第二季表現，跟住我會講吓未來嘅展望。

白銀

白銀（圖1）上升主要有兩個因素。第一就係基本供求，第二就係貨幣政策。喺早幾個禮拜，白銀協會Silver Institute出嘅一年一度白銀供求報告裏面，講得清楚白銀需求喺06年跌咗1.5%，礦產量供應就升咗少少，冇1%。

不過大家要記得，白銀06年嘅 平均價錢比起05年升超過50%。價升50%，新供應先至升少少，需求又只係跌咗啲。

仲有礦產供應6億幾盎斯，需求係9億盎斯，之間嘅分別就有存貨來彌補。其中一個最大嘅存貨來源──各國嘅政府、央行，舊年就賣咗7000幾萬盎斯。以前啲政府、央行，加埋加埋有幾十億盎斯白銀，到舊年尾就只剩1億幾盎斯。

最後，白銀用來做首飾嘅需求大跌，用來做菲林相紙都係一樣，不過做機械、工業嘅需求增加，就完全彌補以上兩樣用途嘅跌幅。供求上，銀價應升。

而喺貨幣政策上，應該會「樓泡爆破印銀紙，美元貶值金銀升」。

所以維持原本建議同目標價：強力買入、120美元盎斯。

和黃

我舊年建議 買和黃（圖2），係因3G好似卒之覺悟，推行「收費文化大革命」X-Series。將大家最痛恨電訊商嘅一貫硬膠收費模式，完全打破，變成公平簡單嘅收費 模式。所以如果連X-Series都救唔到3，咁就再冇方法可以救到3。

今年頭兩個半月，3嘅全球上客量有70萬，令總客量有1472萬。希望到和黃喺9 月出半年業績嘅時候，總客量可以有突破。

不過最緊要就係，如果X-Series呢個收費模式，真係受到消費者愛戴，上客成本應該下跌。到時如果上客量勁， 不過上客成本跌，平均用戶收費可以保持，市場就會相信3得救。

維持原本建議同目標價：強力買入、100元。

H指沽證3497

我叫大家喺舊年買H指沽證（圖4及5），係因為覺得舊年年H指走勢同03年太似。H指之後都有跌，隻認沽證最高都有升超過79%，不過因為我冇叫大家賣，隻認沽證喺上個禮拜打靶，輸足100%。同大家一樣，我都係血本無歸。慘！

江西銅業

銅價現在喺舊年第三季嘅水平，舊年第三季江銅（圖3）賺0.5元一股。只要銅價維持喺呢個水平，江銅每年可以賺2元。亦只要市場相信銅價唔跌，可以接受8倍市盈率，江銅就會16元一股。

維持原本建議同目標價：強力買入、16元。