如何甄選「心中有團火」嘅新移民

今日，孫柏文終極挺曾。對上個禮拜，我已經寫咗好多文章話，我非常認同特首曾蔭權走出嚟話要將特區打造成千萬人城市。因為我想有多300萬人，可以呼吸特區嘅自由空氣，把握自由空氣賦予嘅機會。我阿爺當年就係把握咗呢個機會，先至可以有孫柏文。我亦話過，最想見到嘅就係年輕版李嘉誠、黎智英等嘅移民。佢哋當時係「三冇」：冇錢、冇學位、冇方向。不過就好「好飢餓」hungry，對機會同知識「好飢餓」，對向上爬「好飢餓」。簡直就係心中有團火。

神髓在引入按金

我 亦解釋過，甄選到年輕版李嘉誠、黎智英為香港人嘅移民政策，就係當年嘅「抵壘政策」。「抵壘政策」就係一個完全冇主觀性嘅「入港試」，想「考」嘅人已經自 我甄選過self selected，心中一定有團火。問題就係，喺21世紀社會已經唔可以容忍「抵壘政策」分分鐘要你同鯊魚游水嘅不人道。所以挑戰就係點樣設計一個，可以 捕捉到「抵壘政策」神髓，不過又人道嘅移民政策。

仲有，任何移民政策，喺設計上都要盡量杜絕啲新移民做嗰三樣我哋最驚嘅嘢──去打劫、攞綜援、用醫療。大家可能會問：「係咪真係可以設計一個咁嘅移民政策？」其實係可以。

今日，孫柏文想 同大家分享一個叫做「有團火按金」移民政策。個政策好簡單，就係一個不論喺世界任何角落嘅新移民，只要能夠證明身體健康，跟住畀政府4萬元按金，政府就會 容許佢嚟香港3年。可以自由工作，又可以好自由咁唔工作。3年後可以發還按金，不過如果申請人喜歡，可以再續4年。又4年之後就已經7年，亦即係香港人， 到時候無條件發還按金。

4萬元按金對大家可能好少，不過對一個一係嚟香港，一係冒生命危險搭貨櫃偷渡去花旗國嘅人，4萬元絕對可以證明呢個人「有團火」。點解要係按金，而唔係攞咗就算？因為要盡量杜絕佢哋去打劫、攞綜援、用醫療。

首先，一個理性嘅人為錢去犯法，基本上係計數。值得就會做，如果唔值就唔做。而一般人最驚嘅犯罪活動，就係為錢嘅隨機暴力劫案，例如扑頭黨。好在為錢嘅隨 機暴力劫案回報率往往只有幾百元，所以只要政府話：「被裁定犯法嘅新移民，佢哋4萬元按金會被充公。」啲新移民就會計計數。

當然，如果一個新移民可以做上市公司主席，跟住做假數呃投資者好多千萬元，充公4萬元按金嘅阻嚇作用就真係唔大。不過，我都想擁抱呢個人做我哋一分子。

等新移民知難而退

再講防止新移民攞綜援。如果一個新移民真係山窮水盡，政府可以每個月發還某部份按金，上限設定為兩萬元。仲要好似炒孖展一樣，政府要個新移民喺某段時間內補 啲按金，否則會充公剩餘嘅，跟住遞解出境。咁樣新移民真係會三思，到時候，如果個新移民撈唔掂，對應該知難而退，返歸。

再講防止新移民用醫療。由於新移民 來港前要證明身體健康，所以如果一個新移民來港用醫療，一定係因為喺香港出事。「有團火」嗰種新移民多數係後生仔女，而後生仔女如果真係要用醫療，大多數 都係「災難式」嘅醫療需要，例如撞車。當然，有按金可以扣數，甚至可以強制性要求佢哋證明買咗醫療保險。不過大家要謹記，後生仔女永遠都係社會上最唔需要 醫療服務嘅一群。所以醫療問題應該唔會好大。

各位對移民政策有興趣嘅fan屎，相信你已經準備好鉸剪。希望你可以剪呢篇文章落嚟，為香港五十年後嘅未來， 諗吓我呢個「有團火按金」移民政策。