滙豐出業績 明燈又靈驗

Yesterday... Depressed...

--------------------------------------

噚晚約7點，經常喺理財版《敏妮Talk》出現嘅股王A走過我張枱，見我食緊個厚批pizza，就問我：「有pizza唔call我？」

我望一望佢，捧起個盒，答：「唉…隨便攞。」股王A跟住問：「孫柏文， 乜你唔係減肥咩？」

今次我連望都冇望佢，淨係神情呆滯咁望住電腦，答：「唉…我好depressed…要食啲comfort food。」

股王A再問：「係咪因為今朝你叫人一注獨沽賣滙豐，跟住4點半滙豐出嘅業績，好勁呢？」我都未答，股王A就繼續：「滙豐股價喺倫敦好勁喎，已 經升到143蚊。」

嗰一刻，我只能從塞滿pizza嘅口中答：「唉…」

股王A跟住話：「你做傳媒呢行做耐啲，就會明白唔係唔可以做forecast，不過 最好係將forecast喺公佈數據之前出街。例如，如果聽日有中央銀行要議息，你又覺得佢會有變動，最好就今日篇文已經出街。因為如果同日出，而你又 錯，咁就會好『火羅』。」

『火羅』。

真係『火羅』。

絕對抵打

噚日，4點20幾分開始，世民兄企咗喺我後面，同我一齊望住電腦螢幕上港交所嘅網站，我隻食指就喺度重 複又重複咁㩒個瀏覽器refresh掣。到4點26分，港交所嘅網站就顯示滙豐控股（005）嘅中期業績摘要。我當然第一時間開嚟睇。

睇 咗陣，世民兄問：「點呀？英雄定屎蟲？」我搖住頭答：「我定係滙豐？」世民兄：「你啦梗係！」

我答：「滙豐盈利升咗25%」世民兄問：「係咪有水份或者非 經常收益？」我：「係，不過就算撇除非經常性收益，盈利都升13%。就算係啲最樂觀嘅分析員預測，都係預期得11%、12%，今次我真係大鑊。」

世民： 「有咁多非經常性收益，係咪賣倫敦總部嘅錢？」差不多要哭嘅我：「仲未入數！」

世民：「你真係大鑊。」

今期特區興「數碼欺凌」cyber- bullying，噚晚我上網睇吓啲人嘅反應，簡直就係「數碼圍毆」cyber-assault。不過我都要承認，絕對抵打。雖然我stand by my call，不過今日真係抵打屎忽，無從還擊。