樓泡集團 反枱內訌

簡直係一齣杜琪峰作品。一個已經被重重包圍嘅賊巢，噚日，有兩個賊忍唔住，反枱。大叫：「我哋唔玩，你死你事，我哋去自首！」呢兩個賊，就係穆廸同 標普。黑社會，就喺呢幾年，憑財技吹大花旗國樓市泡沫嘅利益集團。

一個入籍花旗國不久嘅新移民，月薪只有1500美元，居然可以毋須首期，用70萬美元買 間屋，變成債仔。

放債嘅中介人，話做足功課，搵過「獨立」估價員去估價，話間屋嘅價值，遠比70萬高。呢個估價員知道，如果話間屋唔值70萬，下次就會冇 放債中介人畀生意，跟住被淘汰。

試問有幾多估價員因為咁被淘汰？遺留下來嘅估價員，又可以幾「獨立」？

中介人放債畀千千萬萬個債仔之後，就走去投資銀行， 問佢哋有冇興趣代債仔還錢。等中介人收佣，之後嘅利息收入，就同中介人無關。投資銀行當然樂意接受，因為佢哋都係中介人，都係賺個佣。投資銀行接收呢啲按 揭之後，就將佢哋嘅利息收入結合，跟住將結合咗嘅利息收入流，再以收錢次序分成不同等級嘅投資債券。每個月第一批收到嘅錢，會畀優先嘅債券，排最後嘅就可 能冇錢收。因為呢啲債券從按揭收入衍生出嚟，所以係「衍生工具」。

投資銀行話呢啲債券，特別係優先收錢嘅債券「好安全」。因為已經搵過「獨立」嘅風險評級 公司，例如穆廸同標普睇過，佢哋話係AAA、AA、A。大家都知道，一間公司出債券借錢，穆廸同標普會「金睛火眼」咁睇晒間公司盤數，先至會出評級。不 過，呢啲按揭債券衍生工具嘅評級方法，就非常唔同。

為穆廸同標普擔心

基本上，啲投資銀行去穆廸同標普，叫佢哋為衍生工具出評 級嘅時候，就會提供埋未來宏觀經濟走勢。例如，投資銀行設定未來每年樓價升10%，穆廸同標普就會根據提供走勢，話啲按揭債券「好安全」。因為就算係月薪 得1500美元嘅新移民，都會飯都唔開，去供樓。

就係咁，有好多高息「好安全」債券出現。令更多資金湧入樓市。樓市進一步上揚，債券更「安全」。

不過當所 有要買樓嘅人已經買咗樓，地產發展商又不斷起新樓，泡沫就爆。

冇畀過首期嘅債仔斷供。冇人會理穆廸同標普出評級嘅時候，話只係根據投資銀行提供嘅未來走勢 出評級。大家睇到嘅，只會係AAA、AA等嘅英文字母。如果喺1999年，我同你講話科網股爆破嘅時候，表面上無關嘅會計師行Arthur Anderson會執笠，你一定話我黐線。

真係為穆廸同標普擔心。