終極奧運概念股

孫柏文當年讀大學，上堂嘅時候，喊過一次。成年男人喊，已經算少，不過上堂喊，應該大家都未睇過。我記得嗰班係教「近代東亞歷史」，而令我喊嘅一課，記得當時我坐喺後排，喺息晒燈嘅班房睇一段關於南韓嘅紀錄片。

北京係漢城翻版？

令 我喊嘅一鏡，仲歷歷在目，銀幕畫面上，從高空影住幾個喺橋上嘅人。後面配音話：「到1987年6月，南韓人民發動大規模支持民主政制嘅示威……」，鏡頭慢 慢越拉越闊，畫面上由最初影住幾個人，最後影住一個完全俾人頭塞滿、一望無際嘅廣場。配音：「88年奧運會，喚醒南韓人民對民主嘅訴求，令超過100萬漢 城市民，上街爭取民主政制。到6月29日，獨裁政府嘅執政黨候選人盧泰愚，宣佈完全接受人民嘅要求。宣佈同年12月舉行嘅總統選舉，會以一人一票直選產 生，同時宣佈，金泳三同金大中等反對派人士，全面恢復政治權利。」

唔知點解，嗰一刻，眼淚就開始流出嚟。

今日同大家分享呢個故事，就係因為噚日，我俾老闆 黎智英喺《壹週刊》，《事實與偏見》專欄裏面，題為《時代的演進》嘅文章觸動咗神經。基本上，老闆話，好多樣嘢由星星之火嘅開始，點樣變成普及。老闆首先 用科技舉例，話電話雖然喺百幾年前發明，不過要去到近八年十年，先至去到人人有自己一部。老闆跟住再用生物學舉例，話睡蓮嘅生殖速度一到臨界點，就會以 exponential嘅速度進行。開頭好似冇乜變化，不過一到臨界點，就出現大爆發。

股價實行升10倍

老闆最後就諗：「表 面上，中國大陸的政治改革確實非常緩慢……可是在這表象的下面，正在出現變化。到了2008年北京奧運，中國將要對外間開放了……我希望那將會激發起中國 人……給中國政治改革打出個大缺口。」

如果用股票經紀口脗重複老闆嘅說話，就係：「08北京係88漢城翻版！」

如果真係咁，孫柏文就 有隻股票要推介。呢隻終極奧運概念股，就係壹傳媒（282）。大家諗吓，我哋擁有特區銷量排第一二嘅雜誌、報紙，有台灣排第一嘅雜誌，排第二嘅報紙，基本 上有言論自由嘅華人社會，我哋就掂。

台灣有2300萬人，特區700萬，加埋有3000萬人，祖國有13億人。

用計埋物價水平嘅人均收入計算，祖國人民收入係特區同台灣嘅四分之一。

如果08北京真係88漢城翻版，壹傳媒可以名正言順走進祖國。

13億人，就算除番4，都有3億幾人，現在3000萬人，股價就 2.77元，如果有3億人，咪27.7元一股？

不過同Rapiere傾，佢就會錯意，因為今時今日孫柏文盡量避免用，被紫微楊叔叔評定為硬膠「白話文夾雜廣東話，再加些英文字」嘅「三及第式」語文。所以我話壹傳媒係「終極奧運概念股」嘅時候，Rapiere仲估「終極」係terminal，而唔係ultimate。