榮豐今投票 唯一等天收

上個禮拜，孫柏文寫 過兩篇文講榮豐投資（063）提出想大玩「財富轉移」。當時我話過，大股東對小股民有如被李國章對所有特區學生一樣，全力蹂躪。我亦講過，就算人治色彩濃 厚嘅證監同港交所，批准呢啲蹂躪手法，喺有互聯網之後，你做嘅衰嘢，係唔會銷聲匿迹，永遠被互聯網存載。之後只要有人google榮豐大股東四兄弟嘅名， 就會搵到我嗰篇警惕世人同佢哋家族合作會有乜結果嘅文章。

再講多次，即係話就算證監同港交所嘅人唔收佢，Google呢個天收佢。當時，我亦懇求網上各路英雄bloggers，出手相助、一齊發功，連結到我篇文，等啲人google大股東啲名時，我篇文會喺「搜尋結果」嘅第一頁見到。

嘉許bloggers相助

今 日，榮豐啲小股東將會投票決定是否接受大股東嘅蹂躪建議，成功與否我都唔敢關心，恐怕會傷心流淚。不過，我今日就想同榮豐嘅鍾斌銓（主席）、鍾金榜、鍾燊 榮、鍾斌盛講，你哋今時今日google自己個名，名列前茅嘅「搜尋結果」就係我篇文。仲要唔同報紙，十年八載都會喺網上一click之隔。

他朝，姓鍾嘅 後裔要做生意，搵拍檔，啲人只要一click，一係會卻步，就算做都必定會要求更好嘅條件、更高嘅保障。呢個就係你為後裔留下嘅結果。

最後我想嘉許以下出 手相助嘅bloggers，尹思哲、袁彌明、利世民、Pulp、會計仔、東南西北、Angus、Money cafe同Rapiere，bloggers unite！