次按危機？信貸危機！港股點炒？

喺特首曾蔭權眾多花名中，例如「煲呔」、「政治家」、「當奴」等，孫柏文覺得最親 切嘅，就必定係「聖誕權」。當年，香港從殖民身份被祖國解放，啱啱遇上亞洲金融風暴。就喺風暴嘅第一浪，當時嘅財政司司長曾蔭權，預言特區將會喺97年聖 誕前，冇事。「聖誕權」呢三個字，絕對係我哋嘅集體回憶。

咁點解「聖誕權」對我最親切？因為作為一個財經口水佬，一個成日都估錯嘅財經口水佬，每一次聽到 「聖誕權」呢個花名，就會令我知道，就算估錯嘢，有一日都可以翻身。

不過，如果大家再諗深一層，曾司長作為政府官員，就算知道自己講嘅嘢錯硬，除咗可以話 「好快冇事」之外，又有其他選擇咩？

做財長真難

今日分享呢個睇法，就係因大前晚，我睇財經台CNBC，見到花旗國財長 Paulson接受訪問。財長被問及關於滙率問題嘅時候，又再一次用「強美元、強美元」呢個模範答案作答。

最弊就係，電視中嘅財長就話「強美元」，不過喺 電腦螢幕當中嘅美滙指數，就挑戰歷史新低位，仲要一跌穿低位就無底深淵。只可慨嘆一句：「做財長真難。」分分鐘瞓唔着覺。

跟住前晚，CNBC就請咗管理全 球最大債券基金，被稱為bond king嘅Bill Gross做訪問。首先，大家要知道Bill叔唔係好似我咁，鍾意譁眾取寵，佢係一個用字非常小心嘅人。不過前晚，佢就話花旗國公司出嘅高息債券（即係比 較牙煙嘅債仔），已經發生黎克特制8.0級地震。好多投資銀行幫客出債券，根本完全無人問津。

信貸現斷層

情況就好似97年。 當時泰銖已經貶咗值，不過「講關係」嘅投資銀行百富勤，就好似今時今日啲花旗國投資銀行一樣，應承幫一間收印尼盾嘅雅加達的士公司發美元債。點知賣唔去，百富勤要自己硬食。之後，印尼盾大幅貶值，間的士公司還唔到美元，百富勤就咁執笠。

當然，百富勤呢啲中間人執笠，就連冇事嘅公司都會有事。因為好多公司常要借錢去填舊債，只要一發唔到新債，就會出現信貸斷層危機，Contagion就係咁嚟。問題就係，每一次出現信貸危機，聯儲局就會減息，不過正當美滙指數徘徊喺 就跌落無底深淵嘅水位，又可以點？

最後，大家可能會問：「花旗國出現信貸斷層危機，特區股市會點？」只要祖國大水喉仲係對住我哋，當然仲係長升長有啦！