Tuesday, July 24, 2007

與中大女股神午餐

今日,孫柏文counter-spin

上個禮拜,我排除萬難、 鼓起勇氣,卒之搵到前排喺投資比賽裏面,兩個月賺二十倍嘅「中大女股神」王雅媛,同意一起共晉午餐。實不相瞞,《金手指》歷史裏面,我從未試過寫一個人, 寫到有罪咎感,王雅媛係第一個。當時我話過,如果可以以佢嘅速度賺錢,由一蚊開始,就可以喺年半之內賺到等如花旗國國債總和嘅錢。

我當時不單止懇請王雅媛收畢菲特為徒,仲要因佢賺錢能力高到唔需要搞基金收客,投資自己嘅錢就夠,所以我就話:「孫柏文就退守到第二個希望,希望娶呢個上海妹做老婆,令港女棺材又多一口釘。」篇文最後仲有張王雅媛嘅相,上面狠狠地寫咗個fluke字。睇番,就連孫柏文都覺得過晒火,冇可能原諒。所以今次王雅媛同意去食飯,畀機會我向佢道歉,我未見真人已感受到佢嗰份class。

當我向上頭滙報將會有呢個約會時,隔籬《中環在線》一欄嘅李華華,就問可唔可以一齊去。我答:「點解唔得?」華華就問:「你話過希望娶佢做老婆喎,唔怕我做電燈膽咩?」聽到,我就諗,唔通《金手指》啲笑話有如「皇帝的新衣」般,要聰明人先至可以睇得到?

到約會當日,我第一眼見到王雅媛嘅時候,真係覺得佢好瘦。瘦到係我驚如果太熱情,會好似《亞洲華爾街日報》論壇版揸fit人見到啲超瘦人嘅時候話: 「Looks like I could break her in half。」唔知係咪因李華華夫婦啱啱生咗BB,華華就問王雅媛:「咁你出世有幾多磅?」原來,有9磅。跟住華華就睥住我問:「你咁肥,咁你呢?」我就答 有8磅幾。

跟住華華就問王雅媛:「你覺得《金手指》漫畫裏面嘅孫柏文同真人有冇分別?」佢話有,比想像中肥。我聽到佢咁答,真係開心,因為知道多年來賄賂漫畫組啲同事見效,畫到我瘦啲。不過我又諗,佢如果可以好誠實咁話我比佢想像中肥,就不如set多個波畀佢射,所以我就問:「你覺得我幾多歲?」

大家要知道,我由16歲開始已經係咁嘅衰樣,現在仲要唔剃鬚,所以都知應該估錯,只係錯幾多。平時,啲人估我幾多歲都只會求求其其咁答,不過王雅媛就唔同, 佢真係好細心咁睇吓我眼角有冇魚尾紋,睇完佢就估我31歲。嘩!31歲!超開心,好耐已經冇試過有人錯得咁少。原來飲好多水真係有效。

到呢一刻,好似唔耐煩嘅華華突然插嘴問王雅媛:「佢話過想娶你做老婆,你覺得點?」講真,對一個啱啱20出頭,好有修養嘅女仔,你想佢點答?華華心諗當然係: 「叫個肥仔慳啲啦!」為咗解破呢個尷尬僵局,我就順住咁笑話有諗過買花畀佢,跟住轉話題問佢覺得上海女仔同香港特區女仔有冇分別。亦出於對外省女性比港女 文化嘅好奇,我就好似個做緊社會學研究嘅科學家一樣,問佢嘅擇偶條件。王雅媛跟住就講咗一啲合情合理、好簡單,不過絕對有挑戰性嘅條件。

聽完啲條件之後,我就忍唔住問:「你有冇男朋友?」王雅媛話佢唔想答,不過我心就諗:「冇嘅就good luck to her,有嘅就good luck to him囉。」

原來,王雅媛有個專欄,不過因為係喺我比較少睇嘅友報出現,所以我都唔知。最後,同王雅媛傾偈、睇埋佢嘅文章之後,我可以話以佢嘅story telling能力,對數字嘅敏感,同佢對人嘅empathy,佢只要令人覺得佢冇咁guarded,絕對會係個一等一嘅equity sales。希望佢可以如願以償!

3 comments: