金手指：97香港最重要的一日：7月2日？

孫柏文記得有個曾經如日方中、萬千寵愛在一身嘅後生女仔。當年，佢接受過好多人嘅追求，當中包括好多有錢仔。因為班有錢仔送車、送樓、送鑽戒，所以令個女仔覺得自己唔憂嫁，仲要覺得自己一定會嫁入豪門毋須憂柴憂米。因個女仔對自己嘅未來充滿信心，所以亦令佢開始放縱。佢唔理健康，暴飲酒暴食煙，晚晚有靚仔約出街，仲要玩到天光先至回家。

直至差唔多十年前有一日，佢發現自己大咗肚亦同時患咗性病，仲要消息喺網上廣泛流傳。好多曾經追求過佢，嘅男仔，即時銷聲匿迹，仲要佢突然思覺失調，將所有想幫佢所以仲有搵佢嘅男仔，去到佢屋企嘅時候遭到禁錮，令到就連嗰啲男仔都離棄佢。最慘就係當其時個女仔，因為揮霍無度，所以債台高築需要宣布破產，而因要服重藥治病，連肚裏面個BB都冇埋。個女仔好快直插谷底，難以翻身。

十年之後，呢個女仔亦改邪歸正，潔身自愛，生活健康正常，開始重拾自信，慢慢滲透出一份明白世故嘅含蓄性感味。當然，佢亦開始發現自己有異性追求，而佢因此而開心。不過，近幾個月，佢亦開始發現追求佢嘅人，當中唔少重施故技，再次送車、送樓。經過一事、長了一智嘅佢，今時今日當然成熟咗好多。所以佢就諗出一個方法，可以搵出嗰啲只求短暫快慰嘅人，結果係佢噚日就喺自己個blog宣布：「要同我拍拖可以，不過一拍就至少一年。」

消息一出，好多正在追求佢嘅男仔，就反射式咁即時「彈開」，怕佢又再玩禁錮，又怕佢宣布拍拖條件嘅目的係因為佢再次「出事」。不過到噚晚，真正熟悉，而真係想娶個女仔入門嘅人，就即刻打電話畀佢問：「睇到你個blog，想問你幾時得閒去睇戲？」個女仔答：「好，我鍾意」

大家估唔估到呢個女仔係邊個？咪就係泰國經濟囉！

孫柏文仲記得，97年泰銖貶值點樣引發亞洲金融風暴。東南亞國家，點樣被弄成一副完完整整嘅骨牌，一推就冧。泰銖貶值日係1997年7月2日，可能呢日先至係97年中，對香港最重要嘅一日。

As the year proceeded... You needed more and more Thai Baht to buy one US$