聖誕警掃毒 和黃繼續High！

今日，孫柏文原先想祝大家聖誕同新年快樂，不過有個老前輩提醒我，「樂」呢隻字始終同「落」差唔多音，所以前輩就叫我諗啲新嘅祝福語。今日，孫柏文就祝大家聖誕同新年快high。大家可能會問：「呢排為『保護』年輕人，警方好似好嚴厲掃毒。咁冇晒啲fing頭丸同Ketamine，呢個聖誕點high啊？」

如果你問得「呢個聖誕點high啊？」，孫柏文相信你冇聽我呢幾個禮拜嘅話。因為我呢排重複、又重複咁叫大家「一注獨贏買和黃」，而如果你有聽我話買咗13和黃，呢個聖誕真係唔high都唔得。點解？因為近呢幾日，印度真係傳來好多2332和記電訊旗下嘅印度業務，收到愈來愈高出價嘅收購建議書消息。

上個禮拜，我為大家計過數，如果和電出售佢哋佔有66.7%股權嘅印度第三大電訊商Hutchison Essar（HE）嘅股權，而賣價係當間公司值170億美元。和電就可以收到113億美元，即每股18.5港元。和電上個禮拜收市價18.28港元一股。亦因13和黃佔和電49%嘅股權，和黃都可以每股袋10.3港元。和黃上個禮拜收市價就有77.8港元一股。

雖然，上個禮拜我計數嘅時候，估HE值170億美元，已經係市場覺得嘅上限。不過，近呢幾日市場開始傳HE估值已經達到180億美元。有啲消息仲話前宗主國 Vodafone，會出135億美元，淨係買和電手上嘅66.7%股權，令成間HE估值超過200億美元。競投之熱烈，有如97年香港解放前，拍賣地皮嘅情況，印度報章講到啲買家，好似當年信和置業嘅黃志祥般「神勇」。

大家可能會問：「如果和電收到135億美元，有等於幾多？」135億美元，就等如1053億港元。當年99年，和黃靠賣Orange榮獲「全球最賺錢公司」嘅名銜，和黃都之不過收到1130億港元，而和黃股價亦升到超過130港元一股。如果和電最終真係收到135億美元，和電每股就會有22.1港元，和黃亦會有12.3港元一股。今年聖誕，買咗和電同和黃嘅人，真係差佬掃毒，都仲會natural high！