今日，想為大家繼續跟進有關2332和電印度業務，傳聞收到好多收購建議書同出價。不過，講最新消息之前，孫柏文想同大家重溫一些關於和電印度業務同總體印度無線電訊業務條例嘅基本資料。
和電印度業務叫Hutchison Essar（HE），和電擁有66.7%嘅股權，其餘嘅股權就係印度Ruia家族旗下嘅Essar集團擁有。13和黃就擁有和電49%嘅股權。而以噚日收市價計算，和電本身市值大約110億美元，和黃市值就大約420億美元。如果和電真係賣盤，一，可以只係將自己手上嘅66.7%嘅股權出讓，或者二，將成間公司出讓，然後拿走收購收益嘅66.7%。第一個方案，理論上毋須Essar同意，第二個方案則需要Essar嘅合作。
各 大傳媒已經報道過有好多間公司有興趣收購和電印度業務，有印度本地公司，亦有外國電訊集團同投資基金。首先， 根據印度電訊業條例，如果一家已經擁有電訊業務嘅公司，想入股其他電訊公司，上限設於股權嘅10%，如果超越10%就要進行全面收購。所以，如果和電想接 受印度本地其他電訊商嘅收購建議，就一定要有Essar嘅合作。
根 據《經濟學人》，以每月上客量計算，印度上個月已經超越中國，《經濟學人》一報道呢段消息，全球投資界即刻平地一聲雷，個個都想玩。今時今日，傳得最熱嘅 會購買單位，就係印度第二大無線電訊公司。前日，孫柏文講過嗰間公司嘅老闆Anil Ambani，已經去過拜神，傳聞係為收購和電印度業務祈福，亦曾經去過搵Ruia家族，希望可以得到Essar嘅合作。最後，市場傳聞話佢想喺佢老竇生 忌嗰日，12月28日，希望可以宣布成功收購HE。
仲 有，市場傳聞馬來西亞Maxis集團為首嘅財團，已經出過135億美元去買起將成間HE，不過已經被HE拒諸門外。市場仲傳，話雖然Maxis第一次出價 唔成功，不過已經再次出價。市場仲傳話，可以打動和電同Essar嘅價，最少要150億至170億美元，等如和電可以收到100億至113億美元，即每股 16.6至18.5港元。和電噚日收市價18港元一股。
和電嫁女 和黃豬籠入水
噚 日，市場亦有傳聞話啱啱以35億美元賣咗瑞士無線電訊業務嘅前宗主國Vodafone，亦有意加入戰團，收購HE。因為Vodafone毋須收購全間公 司，所以可以淨係出價買和電手上嘅66.7%股權。雖然，市場流傳咗HE值150億至170億美元好耐，不過，Vodafone就算被傳出好有興趣用好多 錢，做咁大型嘅收購，噚晚喺倫敦市場Vodafone仲要升，一反平時做收購者令股價下跌嘅現象。
傳媒仲要話Vodafone升係因市場相信 Vodafone會出價收購HE或和電手上嘅66.7%股權。如果Vodafone升嘅原因真係咁，即係話市場覺得如果可以用170億美元買HE都仲係 抵。點樣都好，就算買家買HE 66.7%嘅股權或成間買起，買家都自然希望同Essar保持良好關係。所以成單交易嘅關鍵就係Essar。Essar集團啱啱先完成減債活動，所以好似 話冇賣盤壓力。
不過，如果真係有人出價170億美元買HE，和電可以收到嘅113億美元，即係港元881億，就差唔多係當年13和黃賣Orange收到1130億港元嘅八成。亦即係今次就連和黃都會袋，相等於上次出售Orange四成嘅錢，即每股10.3港元。噚日，和黃收市價76.75港元一股，條數就係咁計，大家自己執生啦！
No comments:
Post a Comment