H股指數 11日內見10700點？

噚日，中資國企金融類股份大升特升，好似開緊個大派對。唔知道係唔係因用咗來抽新股嘅錢，返回股票市場，不過噚日孫柏文「落區」打聽散戶投資氣氛，走去咗銀行觀察下圍住股票機啲人嘅時候，就感受到一片濃烈嘅亢奮感覺。

個 個散戶都好似生咗隻金手指，雖然篤來篤去都係國企金融股，不過眼見篤乜嘢股票編號入部報價機，都係升、升、升！我企咗喺報價機附近足足有成三十分鐘，其間 只有一個嬸嬸散戶篤過隻跌嘅股票，佢想睇嘅股票就係1818招金礦業。睇見佢篤咗隻跌嘅國企股，我都好想知道佢嘅感受，所以為咗完全找出真相，我就不畏艱 難咁問咗嬸嬸一句：「嘩！你咪好傷囉？」

剎那光輝唔代表永恒

點 知，我一問完個問題，個嬸嬸就轉身，用一雙好似識發雷射光嘅鹹蛋超人眼望着我。跟住佢就話：「肥仔！佢上市嗰日，我已經放咗啦！好彩我冇聽我仔嘅話，佢同 你一樣咁肥，又一樣咁多口，成日都話黃金、白銀會升。睇吓！睇吓！升個屁。」嗰一刻，我真係好想學當年蔡楓華咁，幫嬸嬸贈興，同佢講句：「剎那光輝唔代表 永恒。」

一致唱好跌市先兆

不 過我最後都冇講。令我冇同佢講呢句話嘅原因，係因為H股國企指數已經好似03年12月一樣，進入大升狀態，雖然唔代表永恒，不過真係可以好光。睇番03 年，H股指數喺12月升咗25%，由4000點升到5000點。如果今年12月都有同一升幅，H股指數就會見10700點。不過剩番7個交易日就到07 年，唔通真係可以每日升200幾點？孫柏文知道起碼噚日得。

講起07年，花旗國傳來一陣 對股市非常壞嘅消息。金融新聞社《彭博》Bloomberg報道，華爾街最大嘅十二間行當中嘅投資策略員，都非常之罕有地口徑一致、異口同聲話07年股市會升。大家可能會問：「佢哋班人，個個都係投資銀行嘅精英，佢哋話升，有乜唔好？」問題就係，佢哋最後一次完全口徑一致話市會升，就係喺00年尾預測01 年股市表現嘅嗰一次。但01年埋單計數嘅時候，標普500指數最後跌咗13%，而恒生指數都跌咗24%。

孫柏文覺得，散戶、專家，大家對分析未來股市走勢嘅能力，其實差唔多。只要有異口同聲話升市嘅情況出現，個大市就一定跌。問題只係幾時會跌，同跌幾多。不過，我建議大家盡量用今年最後呢個交易日去狂歡 (click play)，等到出年先至去擔心跌市呢啲掃興話題。