我今日希望大家會記得，中央銀行濫發鈔票，所有資產，包括股票都會大升特升。大家可能會問：「資產升值，大家有錢贏，中央銀行應好開心。有乜問題？」問題所在，簡單講句就係中央銀行將貨幣供應大增，就會壓低借錢嘅成本，引誘企業家借錢創業或投資。不過，每一次貨幣供應大增，就會衍生兩個問題。
第一個問題係貨幣供應大增時，新資金未必會去投資，可能去咗投機買賣，甚至會去咗畀人消費。如果當今世上有100蚊，亦有100件貨物，貨物平均價錢就會係 1蚊，不過如果中央銀行印刷銀紙，令到世上有200蚊，不過貨物數量又維持喺100件，貨物平均價錢就會升至2蚊，即係100%通脹率，購買力減一半。所以，中央銀行濫發鈔票，所有資產，包括股票都會大升特升。
第二個問題係如果有過份貨幣供應，就會出現大量「錯誤」冇價值嘅投資。例如，如果有一大批人借錢起樓，不過最後因為冇基本需求，樓市大跌，借錢起樓嘅人就會資不抵債，買咗樓嘅人就會負資產，繼而令經濟衰退變成大蕭條。最後需要中央銀行進一步將貨幣供應增加，出現惡性循環，上述通脹情況愈來愈嚴重，資產泡沫愈發愈大。最後令到貨幣購買力崩潰，人心惶惶恐慌性拋售該貨幣，最終就會好似人類自古至今嘅所有紙幣一樣，冇人用、變廢紙。不過，未去到最後，中央銀行濫發鈔票，所有資產，包括股票都會大升特升。
呢幾日，有兩批人士在戰鬥，第一批係希望花旗國中央銀行繼續濫發鈔票，去彌補花旗國樓市爆煲對經濟表現影響嘅人，佢哋就係「濫發派」。而第二批人就係懲罰中央銀行濫發鈔票嘅人，佢哋就係「懲罰派」。喺呢一場角力當中，最容易睇到邊一面贏緊，就係睇究竟啲量度美元購買力嘅指標，有冇反映鈔票購買力被削弱嘅事實。
第一回合星球大戰（上個禮拜到今個禮拜一），「懲罰派」將量度美元兌其他貨幣購買力嘅美滙指數推低，直迫從73年美元同黃金脫鈎以來，從未穿破嘅80點範圍。而大家都相信如果美滙指數跌穿80點將會引發恐慌性拋售，摧毀全球對美元嘅信心。所以，市場相信中央銀行要投降、要停止濫發鈔票，所有資產，包括股票都大跌特跌。
第二回合帝國反擊戰（禮拜一之後幾日），「濫發派」開始反擊，知道要中央銀行停止濫發鈔票嘅主要壓力來自急速下降嘅美滙指數，所以就開始向控制歐元嘅歐洲中央銀行施壓。因為歐元佔美滙指數比重57.6%，只要歐洲中央銀行一齊去濫發鈔票，美滙指數就會喘定，停止濫發美元嘅壓力就會被瓦解。中央銀行就可以繼續濫發鈔票，令到所有資產，包括股票都會繼續大升特升。
第三回合武士復仇（未來？），「懲罰派」知道有一項量度美元購買力嘅指標，係冇得「做數」。如果呢個指標失控，就會暴露濫發鈔票、購買力被削弱嘅事實。所以如果呢個指標失控，中央銀行就真係要投降，抽錢走去保衞美元。呢個指標就係金價。大家只要睇番今年5月，金價開始急速上升，開始暴露美元購買力被削弱嘅事實。一眾中央銀行，為保長遠可以繼續濫發鈔票嘅能力，就犧牲短期利益，將錢抽走去保衞美元。
結論就係，只要一日金價升勢緩慢或者唔升，中央銀行就可以繼續濫發鈔票，令所有資產，包括股票都繼續大升特升。所以，如果大家想估股市幾時見頂，想估中央銀行幾時抽錢走，睇金價就得（附圖）。
No comments:
Post a Comment