叫雞無罪！

噚日，孫柏文約 咗《利字當頭》一欄總舵主利世民兄食飯。因為我有一個經常遲到嘅壞習慣，所要去到餐廳嘅時候，已經見到世民兄坐低睇緊餐牌。當我走埋去，坐低嘅時候，世民 兄就同我講：「你又遲到，我好肚餓。不如，叫咗嘢食先至慢慢傾。」所以，我就攞張餐牌睇，睇吓有乜好食。睇吓睇吓，我忽然問咗利世民兄一句：「你呢排有冇 叫雞？」

食物愈唔安全，對大財團愈有利

唔知道佢係唔係血糖低，不過一聽到我嘅說話，佢就使出我好耐未見過嘅「超級薩亞人」眼神，問番我一句：「孫柏文， 你喺到講乜啊？」我都呆一呆，亦即刻解釋，因為唔知道有乜好食，又俾呢排啲有關食物安全嘅新聞纏繞，所以先至想了解世民兄嘅飲食習慣有冇改變。又可能因為 我曾經做過當時係立法會議員陸恭蕙嘅intern，沾染咗陸議員嗰種將番鬼佬環保詞語low energy變成「低能」嘅中文用法（disclosure：陸議員同我同一間中學畢業，大家中文都係咁上下），所以先至衝口而出，問佢有冇「叫雞」。解 釋完之後，世民兄就大笑，亦放低餐牌向侍應生叫咗個咖喱雞飯。

我哋一路食飯，就一路討論如果大眾市民覺得食物唔安全，用經濟角度分析，會有乜嘢後果出現。 咁我哋都同意，食物愈唔安全，對大財團愈有利，而理由亦好簡單。最初，食物供應鏈當中，不論係種植、飼養商，分銷商或者零售商戶，全部都可能係小商戶。

有 一日，某項食品嘅安全出咗問題，市民第一個反應就係罷買該項食品。而政客第一個反應就係「再三要求」政府「確保」食物安全。當然，政府根本就無能為力，所 以市民亦會漸漸覺得政府冇可能確保食物安全，繼續罷買。不過，因為有些食物，例如雞蛋，係日常飲食當中佔有太重要嘅地位，市民冇可能長期罷買，所以必定會 有人察覺到，市民其實肯出高價去買雞蛋，只要供應商可以確保安全就可以。

如果你係小商戶，Sorry

不 過，一個零售商戶如果要確保食物供應係安全，就一定要有規模。因為零售商戶淨係要養活一隊人去做檢查，都要好多錢，所以零售商戶做唔到某個銷量，根本不能 彌補檢查成本。大家都知道街市擺檔嘅個體戶，根本冇可能檢驗食物，漸漸就會傾向幫襯連鎖式超級市場。當然，大家都知道超級市場都經常有有關食物出問題嘅醜 聞，不過大家都知道我哋特區超級市場嘅反應，一定比政府快。因為如果出事，負責安全嘅超市職員面對嘅高層壓力，一定會比政府負責安全嘅公務員多。

正當世界 各地嘅連鎖式超級市場，都在尋找盡量安全嘅食物供應時，都希望購買過程可以愈簡單愈好。最好就係可以同一間飼養商協商，毋須再去另一間。所以大家亦會見到 飼養商規模愈來愈大。到時，食物安全絕對會提升，而因為消費者願意出比現在更高嘅價錢，去買一份安心，呢啲大型飼養商、零售商亦會賺大錢。其實我所講嘅已 經發生緊，前日喺花旗國都有一單買賣，就係兩間家禽飼養商進行收購合併（Pilgrim's Pride同Gold Kist），成為全球最大嘅飼養商。

如果你係一個食物供應鏈當中嘅小商戶，唔好話我冇警告過你。