和黃月底見$100？

大家作為《金手指》嘅fan屎，都會留意到，孫柏文每一次出「一注獨贏」呢四個字為大家提供投資建議嘅時候，都會提供埋「目標價」同目標價嘅「時限」。

例如，今年3月6日叫大家「一注獨贏買白銀」嘅時候，我為大家提供嘅目標價就係120美元一盎斯，而有效限期就係10年至2016年3月6日。

不 過，我相信大家都留意到，我喺11月22日叫大家「一注獨贏買和黃」嘅時候，冇提供埋目標價同目標價嘅時限。理由係和黃嘅3雖然推出完全拋棄以前經營模式 嘅X-Series「無限無線寬頻服務」，不過因為和黃當時未公布X-Series嘅定價，所以我決定等和黃出定價先至為大家提供目標價。

咁上個禮拜五，和黃喺英國嘅3 UK卒之成為第一個推出X-Series嘅市場，亦同時間宣布定價，所以今日我就為大家提供我嘅目標價同目標價嘅時限。

目標價：100元一股

年期：一年至2007年11月22日

大 家可能會問：「點解100元？」首先，我知道好多人覺得買和黃，就等如買佢哋可以運用財技「解決」3多年虧損嘅問題。有啲同行財經口水佬，更加覺得因為可 以睇得明和黃盤數，而引以為榮。不過，經過一個周末嘅時間，我相信市場會將和黃由一間要倚靠財技嘅「計數股」，變成一間炒「無線寬頻服務破格先驅」嘅「概 念股」。

原因係和黃X-Series喺英國嘅定 價，比一般無線服務評論員估計為低，仲要低好多。定價吸引程度，令一些以前多次狠批過和黃嘅英國鬼佬評論員，都大讚和黃今次爭一口氣，仲話會完全改變全行 嘅收費服務模式，令「畀咗錢就可以任用」遲早都會成為行規。市場覺得呢個可能性有幾高？就連Vodafone嘅總裁都喺上個禮拜五咁講，所以今次和黃真係 正途上嘅先驅。

撥亂反正好事近

大 家可能會問：「我都知勁，不過消費者有冇興趣先？」聽聞3 UK嘅網站喺上個禮拜五，因為有太多人瀏覽，所以出現「死機」情況。仲有，平時出咗名快聽電話嘅3 UK客戶服務，都因為有太多人打電話去買X-Series服務，導致客戶需要面對超過45分鐘嘅等候時間，先至可以同服務主任講電話。所以我絕對有信心消 費者喺呢個定價水平，對X-Series有興趣。

噚日，我同一個做對沖基金嘅朋友喺灣仔修頓打籃球，講起消費者對X-Series嘅反應同影響，佢就話： 「嘩！有少少似playstation 3，最好就係3 UK每個禮拜一路公布上客數量。如果市場開始相信3會冇事，和黃真係可以當『概念股』咁炒，年底見100！」可能我朋友忘記已經係12月，仲剩番十幾日， 都係畀和黃多啲時間好。

不過，我都同意朋友嘅睇法，我都希望3 UK可以好快公布上客數量，等市場都可以知道X-Series有幾勁。最後，呢幾日聽3 UK高層說話，察覺到佢哋sell 3嘅方法有變化，重點已經唔再放落功能身上，而係重複又重複咁講「無限無線寬頻服務」，撥亂反正，好事、好事。