無能抗大跌的原因

特區股市當中最唔科學，不過股民又覺得最準確嘅前瞻性警報指標，孫柏文相信係每一次見到有鄭少秋飾演嘅電視劇開始出街。呢個「一播就股市唔掂」嘅信念，已經被股民稱為「秋官效應」。

如果追溯歷史，鄭少秋演戲幾十年，其實係去到90年代初先至有「秋官效應」出現。咁奠定「秋官效應」嘅電視劇，就係當年好受歡迎，描述由70年代開始，香港股市風風雨雨嘅《大時代》。後來呢個劇集重複又重複咁播，所以絕對算係我哋嘅集體回憶。

《大 時代》當中，相信最令觀眾難忘嘅一幕，就係鄭少秋飾演嘅「丁蟹」，將自己四個親生仔掟落街。丁蟹要將四個仔掟落街嘅原因，就係因賭期指輸大錢。而丁蟹輸大 錢嘅方法，就係因為佢「一注獨沽拋期指」，不過股市之後大升特升，所以輸清光。（大家作為《金手指》嘅fan屎，係咪好似似曾相識？）

雖然喺《大時代》當中，丁蟹係癲嘅，不過佢絕對唔蠢。當時佢造淡倉，沽期指，係做足功課，知道有龐大利淡嘅外圍因素圍繞住香港股市（係咪又好似似曾相識？）。不過，丁蟹造淡之後，居然出現香港「三大孖沙」韋家誠、郭英中、賀新出手聯合入市，操控市場，夾硬推高恒生指數。

如 果大家未睇過，可能會問：「點解三大孖沙要無端端造市，將指數推高？」故事因由，《大時代》當中有另一個角色叫做「方展博」，而三大孖沙當年就係靠方展博 老竇出手，先可到股市集資，將自己公司上市。不過最後丁蟹害死咗方爸爸，亦同時變成方展博嘅仇人。故事中，方展博向三大孖沙求助，希望佢哋可以入市，而三 大孖沙就抱住報答恩人嘅心態，將指數推高，夾死咗丁蟹呢個大淡友。

故事中，方展博向大孖沙求助嘅一幕，絕對可以相信如果唔係有見面地點環境嘅幫助，三大孖沙係唔會出手。大淡友丁蟹亦會贏大錢。方展博同三大孖沙會面，咁究竟喺邊度，可以令人對特區股市，產生大手入市嘅慾望？

冇錯，就係皇后碼頭！

噚日恒指跌七百幾點，大家知點解啦……

他們聚集在皇后碼頭不是想保衛集體回憶，他們其實是在商談如何大舉入市，奈何全日都被警察滋擾。股市不跌先至奇！