高盛攬上身 最後骨牌已放好

噚日，特區股市成交量進一步下跌，得嗰500幾億。股市感覺上，好似噚日我講過咁，繼續喺風眼中。

不過孫柏文覺 得，喺呢個可以唞唞嘅時間，不如退一步以宏觀角度睇睇呢場信貸風暴。又或者從另一個角度睇，呢場風暴係點形成。以下就係番鬼佬一個比較玄，關於周期嘅睇法，我想多謝網友「暗黑的卡夫卡」、「zombie」同利世民幫手繙譯。

奴役中得到啓發，
啓發後產生勇氣，
憑勇氣爭取自由，
自由孕育出豐裕，
豐裕腐化成自滿，
自滿養成了苟且，
苟且淪落為依賴政府，
而依賴中者恒被奴役。

一有事玉石俱焚

呢場信貸風暴，原先係因融資市場發現資金流向可以更 有效，所以發明新嘅財技去達致社會向榮嘅目的。點知，走火入魔，誕生咗股神畢菲特所謂嘅「金融大殺傷力武器」，如果用以上番鬼佬周期嘅分析，今次信貸危機 已經到達「苟且淪落為依賴政府」嘅階段。

當然，金融業當中有人想力挽狂瀾，而當中表表者，一定係投資銀行高盛Goldman Sachs。好多銀行都有管理投資基金，而大家亦見到好多呢啲基金，因為沾手次按債券及其衍生工具，又或者投資其他嘢不過做太多孖展所以爆煲。不過爆煲唔 等如一定會製造危機，基金爆煲之後管理嘅銀行點處理，對大圍投資者信心非常重要。

1.上月初Bear Stearns基金出事，注資16億美元，跟住話因太多投資者贖回，最後基金執笠。借錢畀基金做孖展嘅金融機構人人自危，危機唔擴散先奇。你做其他金融機 構嘅股東，唔好話唔驚。

2.上個禮拜BNP Paribas基金出事，原先出嚟話冇事，點知14日後就將基金變成曱甴酒店。喺投資者突然發現有入冇出嘅情況下，如果你有買基金，有冇考慮贖回？

3.Goldman基金前日出事，銀行注資20億美元，攞明姿態如果繼續有事，就會玉石俱焚，呢一招標示高盛精英嘅信心。不過如果問我，高盛今次押重注入 股，將基金攬上身，就有如推骨牌遊戲當中，放下最後一塊骨牌。一推就…