股市「風眼中的平靜」

噚日，特區股市成交量得嗰600幾億，比平時有如用水瓜打狗一樣，少咁截。冇辦法，大家都驚做出頭鳥。上個禮拜，歐洲同花旗國打金融風暴，以前好景時，啲 銀行就好似大賊一樣，個個稱兄道弟，互相承認對方資產嘅價值，你借錢畀我、我借錢畀你。點知一打風，個個反轉豬肚就係……互不承認對方資產嘅價值，大大力 向各方抽走資金。

如果金融體系係一個生命體，錢，就係血。血喺個生命體停止流動時，就有如心臟病發。各國中央銀行，就好似緊急醫護人員面對啲O.D.咗嘅 raver一樣，一支腎上腺素咁打入個心臟，突然令啲raver睇落去好似冇事。大家要知道，設計上支腎上腺素只可以幫三日，三日之後就消散，照理應該繼 續出事。不過，作為白銀戰隊隊長，孫柏文當然唔會排除日日打支腎上腺素入心臟嘅可能性。

不過大家要知道，如果真係日日打，咁我叫大家「一注獨贏買白銀」嘅120美元一盎斯目標價，就肯定唔需要去到我原先嘅2016年限期至靈驗。大家就當腎上腺素發作嘅呢幾日，好似冇乜事嘅時刻，為風眼中嘅平靜。