撤銷「一注獨贏買和黃」

噚日，和黃（013）公佈07上半年業績。對孫柏文嚟講，用兩個字總結，好差。

大家可能會話：「和黃業績好似合乎預期喎，點解你會話好差？」和黃業績，只係合乎市場預期，而唔係我嘅預期。我喺舊年11月22日叫大家「一注獨贏買和黃」，有效12個月嘅目標價仲定喺100元，即係比建議當日，和黃開市價嘅71.95元，高39%。

孫柏文用得「一注獨贏」呢四個字，和黃就唔可以只係交番「合乎市場預期」畀我。就算唔係大紅大紫，都要一鳴驚人。

傷心：業績冇驚喜

當 時，我叫大家買和黃係因旗下嘅3，拋棄以前嘅典型電訊硬膠收費模式，收費方法進行文化大革命，推出「無線寬頻上網服務」叫X-Series。我當時覺得X -Series應該可以令3化腐朽為神奇，而因我對3嘅樂觀預期，當時股價絕對未反映，所以建議大家去買。

不過，噚日睇和黃業績，喺3最先推出X- Series嘅愛爾蘭同前宗主國市場，已簽合約形式嘅客戶增長數量，只有3%增長。就算X-Series服務，由推出至今口碑雖好，不過上唔到客就係上唔 到客。原先，我仲估和黃業績報告當中，將會最令我傷心嘅係佢哋話手上有好多次按投資，就算3救得番，股價都要下跌。不過佢哋冇，但係3都係唔得。

以前我曾經講過，因為「無線寬頻上網服務」X-Series嘅收費模式，已經係3G電訊服務可以畀顧客嘅最終極方案，所以如果X-Series救唔到3，3G本身真係一個冇得做嘅生意。

沽貨：因上唔到客

我唔知道X-Series唔好賣，係因其他例如WiFi嘅無線寬頻上網方法吸引啲， 定係因為X-Series要人用手機上網，而手機始終都唔好用，不過上唔到客就係上唔到客。

雖然，離開目標價有效限期仲有好幾個月，不過今日，我要撤銷 「一注獨贏買和黃」嘅建議。用噚日和黃77.2元收市價計算，係有錢賺（7.3%），不過輸咗機會成本，如果你係因為我嘅建議買咗和黃，今日就係時候放。