投資銀行（Bear Stearns）將收 Margin Call？

噚日，孫柏文講過投資銀行點做「幫客出債券借錢」嘅生意。基本上，有五步。

1.投 資銀行（例如高盛、美林等）問商業銀行（例如滙豐、花旗等）借錢做本。

2.跟住再將錢借畀啲客。

3.啲客收到錢之後，就會出借據畀投資銀行。

4.投資銀行 跟住將借據改名為「債券」，賣畀啲投資者，從中收佣。

5.投資銀行收到投資者買「債券」嘅錢，就會還畀商業銀行。

噚日，我亦重溫過，97年百富點解執笠。 基本上，百富借錢畀客，不過個客嘅借據賣唔出，百富要自己揸住。跟住個客出事，百富手上嘅借據大幅貶值，借錢畀佢做本嘅商業銀行，見到佢資不抵債，就發 margin call，叫百富「補倉」。百富搵唔到現金，所以就執笠。

你唔call佢call

今時今日，國際級投資銀行例 如高盛、美林等，同當年百富一樣，借咗錢畀客，不過啲客嘅借據賣唔出。百富當年要自己揸2.6億美元嘅債券，今時今日嘅投資銀行就揸5000億美元嘅債 券。

當然，大家可能會話：「只要投資銀行被迫揸住嘅債券，冇好似百富嗰啲咁大幅貶值，應該冇事。」咁我就要反問，如果你係商業銀行嘅人，借咗錢畀啲投資銀 行，清楚明白投資銀行現在手持大量債券作資產。不過，債市冇成交，所以冇市價，你作為商業銀行嘅人，你會點做？

如無意外，就應該打電話畀投資銀行，叫佢哋 清楚列明有乜嘢債券喺手，跟住幫佢哋計一計數，如果資不抵債，就發margin call，叫佢哋還錢。

大家要記得，一間投資銀行會同好多間商業銀行借錢，如果你係第一間發margin call嘅商業銀行，將來可能會被抵制。不過，如果間投資銀行真係出事，你發margin call發得遲，投資銀行還唔到錢，咁就賠上十億八億。

60層帝景園又如何

6 月25日，喺我嗰篇題為「Bear Stearns大鑊」嘅《金手指》裏面，曾經將Bear Stearns比喻為一個97年炒幾百層舊山頂道帝景園嘅叔父。

大家可能記得，當時Bear Stearns有兩個佢哋管理嘅對冲基金出事，嗰兩個對冲基金，就好似個細姪走去炒層帝景園一樣。點知，個細姪唔掂，銀行要將佢嗰層帝景園銀主盤拍賣。最 弊拍賣時，啲人出價居然係細姪買入價嘅五折。

個叔父知道，如果因今次拍賣，所有帝景園單位價值要mark低50%，佢自己都唔掂，所以，叔父就出手硬食， 將自己手頭上帝景園嘅單位數量進一步推高。不過，就算好似當年揸60層帝景園嘅「豪宅大王」秦錦釗一樣，個市要跌，揸60層都係螳臂擋車。

去到呢度，孫柏文再問多次，如果你係借咗錢畀Bear Stearns嘅商業銀行職員，你會點做？

PS. Bear Stearns is talking to CITIC for a cash injection... Wonder whats going to happen next