信貸危機快覽 今日個市點炒

信貸危機一出，爆發好多怪現象。首先有白銀，禮拜四「因次按影響大跌」，有其他傳媒條題係咁寫。跟住禮拜五又「因次按影響大升」，條題又真係咁寫。大跌因次按，大升又因次按，咁點先？仲有禮拜五，一向動盪中「避風塘」嘅真貨AAA評級債券，居然面對龐大沽壓。難明，更難做買賣。

今日，孫柏文係想解釋以上怪現象，不過解釋之前，我想大家知道花旗集團Citigroup呢幾個星期，喺信貸業務輸咗7億美元。仲要係同按揭、地產完全無關。7億？喺邊度聽過呢？咪就係滙豐出中期業績，走出嚟話自己為花旗國按揭業務嘅撥備金額。即係話，今次花旗集團輸錢消息，又會令好多叫我做「明燈」嘅人，走出嚟大手、大手買Citigroup。勁！

切記港股流通量大

大家要記得，今次呢個浪嘅源頭係因喺8月1日，法國BNP話自己管理嘅投資基金冇事。不過事隔冇兩個禮拜，就唔畀人贖回，基金變曱甴酒店，有入冇出。BNP8月1日話冇事，遲過HSBC出中期業績7月30日話冇事，唔知HSBC 點呢？

入正題。真貨AAA債券面對龐大沽壓，就係因有好多對冲基金，被人贖回，基金需要現金畀番啲客。不過手頭上嘅「怪誕」債券冇成交，唯一賣出流通量大嘅真貨AAA債券。用基本分析，又點解釋以上嘅現象？已到估人，而唔係分析市嘅地步。你估唔估到？咁你又做買賣？記得，特區股市流通量好大。

最後，白銀確實喺禮拜四「因次按影響大跌」，理由係銀行與銀行之間，因唔知大家有幾大鑊，所以突然抽水，令現金價值急升，所有資產價值下跌。到禮拜五，白銀又確實喺「因次按影響大升」，理由係各國中央銀行眼見「唔夠水」，所以大放特放「止痛水」。

雖然話3日後要還，不過如果日日都放，市場仲唔覺得中央銀行就算摧毀貨幣價值，都要救啲銀行，喺呢個情況之下白銀仲唔升？已到估伯南克放幾多水，而唔係睇基本因素嘅地步。你估唔估到？咁你又做買賣？

禮拜四銀行抽水，所有資產價值下跌。

禮拜五央行見「唔夠水」，所以大放特放「止痛水」，水漲船高，白銀仲唔升？