水草綁蟹 建築面積

呢個周末，有個叫「billy」嘅網友，喺小弟嘅blog留言，問孫柏文：「螃蟹單嘢呀，唔知你觀點係咪同我一樣？希望你寫吓教育大眾。」

最初，我唔係好明「螃蟹單嘢」係講緊啲乜，後來再問billy之後，先至知道原來講緊海關「揭發」有賣蟹商人「呃秤」。「呃秤」手法就係用好多同好粗嘅水草綁蟹，跟住消費者買蟹嘅時候，商人就會水草連蟹一齊秤。最差個案，蟹本身重量只係總重量嘅37%。

自由市場價錢反映

主 流傳媒嘅指定反射式動作，相信我都無需要同大家講，又係喊打喊殺，「奸商」前、「奸商」後。

雖然海關「揭發」賣蟹商人「呃秤」，不過，我想問：「究竟海關 有冇睇埋蟹商與蟹商之間嘅賣價差別？」我呢啲自由市場信徒，絕對相信如果一個蟹商長期呃秤，佢可以叫嘅賣價一定打折扣。甚至可以相信，如果蟹佔總重量得 37%，嗰個蟹販嘅賣價就應該比起蟹佔總重量100%嘅賣價，少63%。除非特區所有螃蟹賣同一個價錢，市場價格係會調節反映現實。

其實，呢個情況同特區 賣樓一樣，多年來，好多硬膠嘅人，成日都話要立法規定啲人用實用面積，而唔准用建築面積。講真，除非特區所有住宅樓宇劃一呎價，如果唔係劃一，樓宇呎價可 以自由浮動，一個樓盤嘅實用面積比率偏低，呎價係會反映。

再講，孫柏文鄉下喺寧波鎮海， 我細細個開始已經食好多大閘蟹。試問，有邊個食過大閘蟹嘅人，未試過食一隻「空心蟹」？咁樣係咪呃人？係咪又要拉人？

再問，如果有實際用途，用嚟防止螃蟹鉗傷人嘅水 草，因為唔食得落肚所以唔准計埋，咁唔食得嘅蟹殼點算？唔通淨係可以計蟹肉？如果碰正個廣東佬，食大閘蟹時連蟹肉都唔食，淨係食膏，係咪要拉晒計埋蟹肉嘅 商人？

最後，講起「蟹」同「樓」，我想提提大家今晚花旗國將會公佈樓宇二手市場，大家密切留意，因為應該會比預期差。