聯儲局前主席格林斯潘，作為花旗國中央銀行行長，除咗話自己要保護美元購買力之外，就係要避免有金融體制「返枱式」嘅動盪systemic risk。每次有危機，都係因有啲機構，或者一類機構，好似孫柏文咁「一注獨贏」，負上太多風險，跟住走勢逆轉，繼而爆煲，牽連市場。
有見及此，格林斯潘當年話好開心見到好多新興財技，例如將按揭變成可以買賣嘅債券securitization，令風險冇需要聚集喺一個地方。
越大越積聚重金屬
講 環保。大家都知道，究竟一樣嘢係咪「毒」，取決於濃度，山埃只要加入足夠嘅水，都會冇害。以前花旗國人將邏輯伸延，決定解決污染嘅最好方法，就係盡量將污 染物溝稀、冲淡。排污入個魚塘就唔得，不過排入汪洋大海就ok。
呢個政策，邏輯上絕對冇問題，不過久而久之，噩夢開始發生。冇錯，攞海水嚟驗，啲海水係冇 問題，不過海裏面嘅小魚兒，開始進食帶有微量例如重金屬污染物嘅海洋植物。小魚兒又被大魚食，而大魚又被更大嘅魚…科學家分析食物鏈當中各級動物時，就開 始發現海洋動物越大，身體積聚重金屬嘅濃度，亦都越高。
禍及金融業重磅企業
「溝稀解決污染」dilution is the solution to pollution，確實係將細範圍嘅災難性污染解決，將污染稀釋至全世界。不過，後果就係全世界各地都有海洋中最重磅嘅動物──鯨魚，因為身體重金屬濃 度過高而死亡。講番財經。今時今日，大家見到世界各地都有啲金融業中最重磅動物，相繼出事。原來，用財技分散風險，同溝稀嚟解決污染，後果都係一樣。孫柏文只可以話句：「Diffusion is no solution to convulsion」。
-----------------------------
Would like to thank Eugene Linden for this piece = )
No comments:
Post a Comment