債王測減息 甚麼又爆升

噚日，特區股市嘅恒指升628點，「路易發」意頭唔錯。

如果大家問孫柏文點解升咁 多，答案好簡單。上個禮拜五，花旗國標普五百跌39點（2.6%），跌穿200日平均線，特區禮拜一就被拖累，跌602點（2.7%）。

不過禮拜一，標普 五百升番34點，差唔多完全收復失地，特區禮拜二個市都冇反彈。要去到噚日禮拜三先至有反應。最弊就係呢排升升跌跌都係成交量少，噚日個市簡直好似我坐喺 桑拿房時嘅血壓一樣，乾升。相信大家同我一樣，都係等緊睇吓花旗國仲有冇嘢要爆。

等，無奈咁等。

白銀仲唔爆升？

我早幾日都一路講，關於花旗國債市出現嘅信貸斷層問題，《金手指》一欄，好少會direct quote。孫柏文推 銷概念畀大家嘅時候，好少會話：「呢個概念邊個邊個專家講嘅。」因為我覺得如過要話「邊個邊個講」，大家先服，個概念嘅說服力肯定好低。又或者掉轉嚟諗， 大家如果聽到一個由我講出嚟嘅概念，都覺得合情合理，個概念嘅說服力就肯定好高。不過，今日就要破例一次。

記得早排，高盛「投降」，由原先話「今年聯儲局 減息三次，減0.75%」，變成「今年唔減息」時，有債王Bond King之稱嘅PIMCO Bill Gross，一於好少理，企硬話聯儲局今年一定減息。當時佢話過，如果淨係睇數據，係應該唔減息。聯儲局唯一會減息嘅情況，就係如果有危機。當時佢企硬， 大家都應該知道佢對危機可以發生嘅機會率點睇。

噚日，Bill Gross又重申相信喺幾個月之內，聯儲局會開始減息。大家可以覺得冇信貸危機，可以同我對賭，不過要知道，都係同債王對賭。

最後，我想引述Jim Rogers，佢話：「成立聯儲局嘅原因，唔係去拯救華爾街。成立聯儲局嘅原因，係去捍衞貨幣購買力。希望佢哋真係會咁做。」伸延呢個邏輯，即係減息等如 放棄保護美元購買力，白銀仲唔爆升？

後記：立法會議員馬力去世，孫柏文今日喺A24論壇版嘅《蘋果批》會談及我對議席補選有乜希望。